ORANJESTAD — Nos ta sigui trese mas potret di e certamen cu Aruba su representantenan a participa aden na Sto. Domingo y a bai cu varios premio, banda di e titulonan maximo den cada categoria. Durante e competencia pre-eliminar den trahe di banjo Aruba su Miss Hispanoamerica Karol Croes a sa di bai cu e titulonan di Best Body y tambe Miss Photogenic den e categoria di Miss. Tanto Karol Croes, Paola de L’Isle y Sergio Winterdal a presenta un apariencia fisico admirable, pero hurado a premia Karol cu e premionan adicional. Nos representantenan a participa tambe den e competencia di Fashion y Talento, unda cu hopi a kere cu nan lo a gana, pero hurado a pensa diferente. Karol y Sergio a compete den trahenan fashion disenja pa Sergio mes. Paola a haci un show di talento unda cu el a baila bachata, salsa y samba cu a pone tur hende den ambiente di baila. Den e potretnan por mira nos representantenan durante e sesion di potret oficial cant’i piscina y tambe durante nan bishita na Altos de Chavon, un sitio turistico na Sto. Domingo. Durante anochi final, Karol a ricibi adicionalmente e premio di Miss Elegancia pa su presentashon den trahe di gala cu por cierto tambe a wordo disenja pa Sergio Winterdal, mescos e shimis di Paola de L’Isle. Nos ta hopi orguyoso di e tremendo trabou cu Aruba su 3 representantenan a haci aya na Sto. Domingo!