CAP ta desapuntá den e manera ku ABVO ta usando e insidente trágiko pa trata operashon aéreo i tópikonan di CAO den publisidat

Willemstad – Djaweps mainta Curaçao Airport Partners a risibí un karta di ABVO ku e petishon pa reuní tokante algun punto ku ta trata operashon. CAP ta lamentá ku ABVO a bai medionan di prensa pa yama atenshon na asuntunan operashonal. CAP ta di opinion ku e deklarashonnan hasí dor di ABVO den medionan di prensa por kousa mas preokupashon den nos komunidat.  E plataforma stipulá pa reuní tokante e temanan ku nan ke trata ta na mesa di reunion, kual ta e lugá kaminda ABVO semper ta bon bini  pa un diálogo habrí ku gerensha di aeropuerto. CAP ta lamentá e hecho ku ABVO ta usa e insidente trágiko aki pa trata aktividatnan operashonal den publisidat i enfátikamente ke aklará na komunidat di Kòrsou, pasahero i usuario di aeropuerto ku Curaçao International Airport ta un aeropuerto safe i ku e aeropuerto ta kumpli ku tur norma internashonal pa operashon i maneho safe di un aeropuerto internashonal i esaki lo kontinuá.