E suseso ku a tuma lugá djamars anochi na Curaçao International Airport ta sumamente trágiko pa Kòrsou. CAP ta lamentá e insidente tristu ku a tuma lugá djamars anochi i lo sigui manehá i operá aeropuerto riba e nivel ku rasonabelmente ta esun di mas haltu pa loke ta safety i seguridat internashonal, manera semper nos a hasi. Kasonan di violensha relatá na kriminalidat, lamentablemente,  ta parti di e realidat sosial di kada komunidat. Kòrsou no ta un eksepshon. Krímen di e naturalesa aki ta un problema sosio-ekonómiko i por tuma lugá na kada momentu i na tur sitio. E sitio, djamars anochi, desafortunadamente tabata Curaçao International Airport…e brùg di transporte aéreo pa Kòrsou. CAP su fasilidatnan, manera ta e kaso na tur aeropuerto rònt mundu, ta diseñá i ta wòrdu operá pa fasilitá un proseso i tránsito safe i efisiente pa biahero i otro usuarionan. E fasilidatnan di aeropuerto ta safe, sigur, ku personal i ekipo adekuá kual ta kumpli ku norma lokal i internashonal. Personal di seguridat di CAP a reakshoná inmediatamente na e insidente segun e prosedura spesífiko ku ta diseñá pa optimalisá seguridat di pasahero i usuario. Djamars anochi, e malechornan ku a kometé e akto kriminal na aeropuerto a drenta e fasilidat riba un manera usual, manera tur usuario lo a hasi, i a parker den e área di parker públiko miéntras ku nan tabata warda riba nan víktimanan. Despues nan a inisiá nan atake, a regresá nan vehíkulo ku tabata di parker i a kibra e barera di e área di parker ora nan a sali for di e tereno di aeropuerto. Curaçao International Airport, operá dor di CAP, ta kumpli ku tur norma internashonal pa operashon i maneho safe di un fasilidat manera un aeropuerto. Mester nota ku e kategorisashon di FAA, e status ‘Category 2’ pa Kòrsou, no tin relashon ku e operashon di seguridat na aeropuerto. E kategorisashon di Kòrsou pa loke ta e ‘FAA Category 2’ ta nifiká ku e kalidat di e regulashon, tékniko, personal i registro i dokumentashon ku mester wòrdu proveé dor di Gobièrnu den nan funshon di supervisor relatá na aviashon sivil, no ta kumpli ku e norma pa e kategoria ‘FAA Category 1’. Nos a komprondé ku Curaçao Civil Aviation Authority (CCAA) ta trahando pa koregí e defisiensianan aki.

Ralph J. Blanchard, A.A.E.

Curaçao Airport Partners (CAP)