WILLEMSTAD –  Minister Presidènt, Sr. Ivar Asjes konhunto ku Minister di Desaroyo Ekonómiko, Sr. Stanley Palm, a hasi entrega di rekonosimentu na e hungadó di futbòl yu di Kòrsou Leroy Fer. Leroy Fer a partisipá den e mundial na Brazil huntu ku e tim di Hulanda kaminda e la logra hinka un gol importante pa e ekipo di Hulanda gana di Chile. Leroy ta di vakashon na e momentonan aki huntu ku su komprometida pa disfrutá di su dushi isla i deskansá promé ku e bek Inglatera kaminda e ta kontinuá ku su karera komo futbolista, ku e ekipo di Norwich City F.C. Leroy sigur tin Kòrsou na su kurason i esaki ta bisto riba su sapatunan di futbòl ku e ta diseñá i laga imprimí e bandera di Kòrsou ariba. Minister Asjes i Minister Palm a probechá di e okashon aki pa a felisitá Leroy pa su logro huntu ku e tim Hulandes durante di e mundial último i tambe pa su gol den e mundial. Leroy a risibí un plakat for di Minister Asjes na nòmber di gobièrnu di Kòrsou i Minister Palm a duna e rekonosementu di Dushi Hende di CTB. Gobièrnu di Kòrsou ta deseá Leroy hopi éksito den su karera i alabes ta felisitá e i su pareha for di awor ku e enlase matrimonial ku nan ta bai drenta. Riba kombinashon di e potrètnan por mira Leroy huntu ku su komprometida, su tata, Minister Asjes , Minister Palm i tambe representante di CTB.