Willemstad – Solamente dos dia tabata falta pa finalisá e trabou di konstrukshon i tene e selebrashon di inougurashon riba djaweps dia 17 di Yüli 2014. E siman aki CAP a wòrdu sorpresá ku e notifikashon di parti di ROP (Ruimtelijke Ontwikkeling en Planning) ku e trabounan di konstrukshon mester para inmediatamente. CAP a paga ROP pa e pèrmit riba 27 di Mei 2014, pero lamentablemente tabata falta un dokumentu atministrativo ku ta regardá informashon tokante ken ta e doño hurídiko di e edifisio. E dokumentu aktualmente ta kla pa wòrdu entregá. Curaçao Airport Partners (CAP) ta hasiendo trabounan di mehorashon pa elevá e eksperensha di biahero, bishitante i empleadonan na aeropuerto,. Den 2014 CAP lo invertí 10 mion dòler den desaroyonan na aeropuerto di Kòrsou, pa medio di diferente proyektonan grandi entre otro instalashon di erko den e Check-In hall i ekspandé esaki; un proyekto mihó konosí komo e ‘Airport Air-conditioning project’.  Pa e motibu ei e akshon drástiko ku a tuma lugá riba djaweps dor di ROP tabata un sorpresa pa CAP. E trabounan pa finalisá e proyekto tabata riba skema i e proyekto lo a kaba promé ku djaweps, na tempu pa e evento di inougurashon. Representantenan di ROP a presentá riba e sitio di konstrukshon i a ofresé CAP ménos ku mitar dia pa entregá e dokumentu ku tabata falta. Esaki por a bai na un otro manera. Normalmente ROP ta konsehá tokante informashon ku falta pa por risibí pèrmit pa konstrukshon, i ademas ta hasi esaki por eskrito mas pronto posibel p’asina CAP por kumpli òf adaptá su plannan di konstrukshon pa evitá retraso innesesario i inkumbinensia pa públiko. CAP ke enfatisá ku seguridat i ofresé un edifisio safe no ta e problema. E konstrukshon a para dor di un fout atministrativo ku ta regardá informashon tokante ken ta doño hurídiko di e edifisio (kual ta informashon ku ta den e Development, Operation and Maintenance Agreement) ku mester a wòrdu entregá atrobe, mes kos ku a wòrdu hasi ora di entregá otro petishon.

Proyektonan grandi na kaminda ku impakto positivo

CAP ta rekonosé ku e ta responsabel pa entrega e informashon nesesario kompletu. Pero tur kos a ser hasí en buena fe i sin mal intenshon. ROP ta hasiendo su trabou i CAP ta komprondé esaki. CAP lo hasi tur lo posibel pa e trabou por wòrdu resumí mas pronto posibel i ta sumamente gradisí pa ku e koperashon ku e ta risibí di tur partner, ministerionan, kompanianan gubernamental i otronan. Ademas CAP ta orguyoso di e kontratistanan ku a kumpli ku un ophetivo ambisioso durante e proyekto. Aktualmente CAP ta bai inisiá konstrukshon di mas proyektonan grandi, entre otro  e Mirador nobo, e General Aviation Center pa avionnan privá, e proyekto pa ekspandé aeropuerto, pues diferente proyekto ku lo tin un impakto positivo riba Kòrsou i e eksperensha na aeropuerto. CAP a indiká ku tur dokumentu nesesario lo wòrdu entregá na tempu i kompletu pa sigurá ku e proyektonan di ekspanshon i mehorashon di aeropuerto por kontinuá manera planeá p’asina ofresé e pasahero i bishitante un mihó eksperensha na aeropuerto.