WILLEMSTAD- 10 di yüli 2014: Durante di un konferensiá di prensa ku a tuma lugá siman pasá na Sürnam,  sr. Percy Pinedo, bosero di Fundashon Bon Intenshon kompañá pa sr. Sigmund Jansen i representante di Ofisina di Turismo di Kòrsou (CTB) a duna informashon relashoná ku e di 5 edishon di Curaçao North Sea Jazz Festival (CNSJF). Diferente medio di komunikashon di Sürnam tabata presente na The Edge Bar na hotèl Torarica kaminda ku e enkuentro ku prensa a tuma lugá. Fundashon Bon Intenshon a gradisí medionan di komunikashon surinameño pa nan kontribushon i kobertura duná na e 4 edishonnan previo di e festival i mesora a ekstendé un invitashon pa un biaha mas nan presensiá e seri di konsiertonan den luna di ougùstùs próksimo. Durante di e rueda di prensa tabatin un interes grandi di parti di prensa pa asina haña informashon relashoná ku e magno evento ku próksimamente lo tuma lugá na Kòrsou. Por hasi menshon di presensia di 18 periodista i fotógrafonan di respektivamente 2 radio, 4 kanal di televishon, 3 korant i un 1 wepsáit. Durante di e enkuentro a duna informashon di e artistanan ku lo presentá, e konsierto grátis ku lo tin ku presentashon di Metropool Orkest dia 28 di ougùstùs próksimo kaminda lo duna un homenage na Doble R i tambe a informá e posibilidatnan ku e periodista tin pa kobertura, kon nan ta registrá i hasi petishon pa nan akreditashon. Na su turno sr. Jansen a duna un bista di benta di karchi i a anunsiá ku e aña aki tin diferente punto di benta pa e karchinan di CNSJF na Sürnam. Promé ku a duna informashon relashoná ku e festival, sra. Janine de Windt den representashon di CTB a duna un presentashon ku imágennan oudiovisual di Kòrsou. Un biaha mas a presentá nos isla komo destinashon faborito den Karibe, ideal pa fakansi, relahamentu i eventonan di taya manera CNSJF. CTB ta gradisí Fundashon Bon Intenshon pa e kolaborashon i mirando e interes grandi di parti di prensa ta premirá un gran kantidat di bishitante for di Sürnam pa e próksimo Curaçao North Sea Jazz Festival.