WILLEMSTAD- 9 di yüli 2014:- Dia promé di yüli aña 1984 Ofisina di Turismo di Kòrsou (CTB) a establesé su ofisina na Europa i e aña aki a selebrá su di 30 aniversario formando parti di e industria turístiko europeo. E selebrashon a tuma lugá na Hulanda den un ambiente karibense i a tene tambe un findishi di arte dediká na un bon kousa. Durante di e findishi a rekoudá un total di 2.550 euro ku a wòrdu entregá na Stichting F.E.L.I.S ku ta un fundashon establesé na Kòrsou ku ta brinda muchanan di ménos rekurso un sosten edukativo èkstra kompañá ku guia spesial. Na honor di e di trinta aniversario i komo un danki na tur partner manera KLM, TUI, Airberlin i hotèlnan na Kòrsou a kombertí e restorant ‘De Nederlanden’ na Vreeland den un paraiso karibense pa un anochi só. Ademas di brinda un parti históriko i wak bèk riba desaroyonan di nos isla a pone énfasis tambe riba e futuro di turismo europeo pa Kòrsou. A konta tambe ku partisipashon di vários artista yu di Kòrsou manera Francis Sling, Avantia Damberg, Richard Terborg i Brett Russell kendenan a ekshibí nan artenan di mas resien. Pa por a krea e ambiente ‘krioyo’ tabatin entretenimentu di Juni Juliet, e banda Kuenta i Tambu i a finalisá e anochi ku un baile típiko di Kòrsou ku koreógrafia di Remses Rafaela. Kòrsou semper a sá di krese komo destinashon turístiko den e merkado europeo. Nos lo ke alkansá pa aki tres aña un total di 250.000 bishitante for di Europa pa aña. Aktualmente nos ta na 170.000 bishitante. Nos ta buskando konstantemente posibilidatnan nobo i aliansanan stratégiko. Semper ku e meta, pa suprayá e diversidat ku Kòrsou tin pa ofresé. E presensia di e artistanan yu di Kòrsou a reflehá e kalor di nos isla ku ta e motibu prinsipal pakiko turistanan europeo ta keda enkantá ku nos Kòrsou. Pa nos ban bèk un ratu den historia… E promé direktor di CTBE tabata Willy Neef (q.e.p.d). Den e temporada ei KLM tabatin 2 buelo pa Kòrsou semanalmente kual tabata sòru pa bishita di 1.600 turista. Awe Kòrsou ta risibí 16 buelo pa siman for di Hulanda i Alemania ku pa aña ta trese un total di 140.000 turista hulandes. For di 2008 a nombra Sr. Edward Suares komo direktor di CTBE.