Willemstad – Fundashon Prevenshon resientemente a ekspandé su pakete di benefisionan laboral ku un areglo di penshun pa su empleadonan. Den e areglo di penshun aki, ku ta wordu finansia pa gran parti pa Fundashon Prevenshon, empleadonan ku kumpli e edat di penshun ta garantisá di un entrada adishonal banda di nan AOV. Direktiva di Fundashon Prevenshon ta konvensí ku desaroyo personal den trabou mester wòrdu bon rekompensá ku entre otro un areglo di penshun ku ta duna perspektiva na su empleadonan pa ora nan yega edat di penshun nan por ta trankil. Pa e motibu aki a sera un areglo di penshun serka Fundashon Mi Penshun ku ta sostené pa MCB i Ennia. Fundashon Mi Penshun ta traha na interes di empleado i dunadó di trabou i e inisiativa aki no tin komo meta pa hasi ganashi, pero pa asina asumí ku un responsabilidat sosial. Maduro & Curiel’s Insurance Services (MCIS) a komprondé vishon i strategia di Fundashon Prevenshon i basá riba nan punto di bista di responsabilidat i deber di kuido, a yega na un areglo di penshun ku a satisfasé empleadonan di Fundashon Prevenshon. Fundashon Prevenshon ta organisa e screening di poblashon pa kanser na pechu. E tèst ta e miho manera pa detekta kanser di pechu tempran. Ku e screening di poblashon aki, Fundashon Prevenshon ke logra ku menos hende muhe ta fayese pa motibu di kanser na pechu. MCIS ta felisitá gerensia i empleadonan di Fundashon Prevenshon ku ta kana dilanti riba e hecho ku den futuro areglo di penshun pa trahadó lo bira obligatorio pa kada dunadó di trabou na Kòrsou.