WILLEMSTAD- 21 di yüni 2014 –E kantidat di anochi ku e turista a keda riba nos pais a krese ku 2% pa loke ta trata e promé 5 lunanan di 2014. E kalkulashon di kantidat di anochi ta un método importante pa midi e impakto ekonómiko direkto ku sektor di turismo tin riba ekonomia di Kòrsou. Un total di 1.587.757 anochi a keda registrá durante e promé 5 lunanan di aña kompará ku 1.556.997 e mesun periodo na 2013. Durante e promé 5 lunanan di 2014 nos a risibí un total di 176.144 bishitante. E montante generá durante e periodo menshoná a keda kalkulá na 300.5mion florin. Region di Europa a sigui desaroyá positivamente registrando un kresementu signifikativo di 7% pa loke ta trata kantidat di anochi ku e turista a keda riba nos isla. Kual ta un total di 887.734 anochi. Konsiderando ku mayoria turista ku nos ta risibí ta bini for di Europa e kantidat di anochi registrá for di e region aki tin un influensha positivo riba e kresementu total di kantidat di anochi. Ademas mester remarká ku e estadia promedio di e europeo ta mas largu. Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante e promé 5 lunanan di 2014, sektor di turismo a generá un impakto direkto di 300.5 mion florin pa nos ekonomia lokal. Aña pasa e mesun periodo aki a generá un montante di 306.7. Turistanan ku a bishita nos for di Europa a gasta un total di 147.1 mion ku ta 48.9% di e total generá e promé 5 lunanan di aña. Sigui pa turistanan for di Sur Amérika ku a gasta un total di 66.2 mion florin miéntras turistanan for di e region di Nort Amérika a gasta un total di 59.2 mion. E entrada generá for di Karibe den e promé 5 lunanan di e aña aki a keda kalkulá na 15.7 mion. E kantidat di turista di estadia for di e region di Europa a konosé un oumento di 6% den e promé 5 lunanan di aña. Na sifranan apsoluto esaki ta un total 79.928 turista europeo kual ta 4.221 turista más kompará ku e mesun periodo aña pasa. For di Hulanda nos a risibí e promé 5 lunanan di 2014 un total di 60.264 turista. Esaki sigur ta debí na e esfuersonan di merkadeo den estrecho koperashon ku mayorista manera Corendon, TUI i Kuoni/Does & Cadushi. No opstante e kresementu registrá pa e region di Europa den e promé 5 lunanan di 2014 e sifranan total si a registrá un bahada di 4%. E retonan pa loke ta trata airlift riba diferente ruta kompará ku 2013 tin su efekto riba e sifranan total di kantidat di turista di estadia for di Nort Amérika, Sur Amérika i for di e aria di Karibe. Respektivamente e regionnan aki a registrá un bahada di 9%, 16% i 14 % pa loke ta trata kantidat di turista di estadia. E promé 5 lunanan di aña nos a risibí un kantidat total di 176.144 turista di estadia. Na 2013 e mesun periodo un total di 183.533 turista di estadia a bishita nos pais. CTB ta envolví den diferente kampaña di promoshon den diferente merkado pa asina logra subi e kantidat di turistanan pa nos isla. E kantidat di turistanan for di e 5 merkadonan prinsipal pa Kòrsou pa loke ta trata e promé 5 lunanan di 2014 tabata; Hulanda ku 60.264 (34.2%), Venezuela ku 27.432 (15.6%) Estádos Unídos ku 22.571 (12.8%), Canada ku 7.970(4.5%) turista i Alemania ku un total di 7.923 (4.5%). Turismo krusero a konosé un kresementu di 3%. Un total di 325.005 turista krusero a keda registrá durante e promé 5 lunanan di 2014. Aña pasa e mesun periodo esaki tabata 316.350. Kontando e kantidat total di turista ku a bishita nos pais sea por medio di avion òf barku nos ta yega na un total di 501.149 turista pa e promé 5 lunanan di aña. Si nos kompará e sifra aki ku 2013 e kresementu a keda neutral pues 0%.