WILLEMSTAD-  Aña pasa e Beach Cleanup day organisá pa Garnier huntu ku e partisipantenan di Miss Curacao Teenager tabata un éksito rotundo. Partisipantenan di Miss Curaçao Teenager 2013, huntu ku nan respektivo tim a hasi huntu un trabou fenomenal limpiando e área di Caracasbaai. Djadumingu awor un biaha mas Garnier ta organisá otro tremendo Beach Cleanup day na Caracasbaai huntu ku partisipantenan di Miss Curaçao Teenager di e aña aki. Garnier ta un liña di produkto ku ta hasi su máksimo pa protehá i kontribuí na un mihó medio ambiente den kada un di su produktonan. I aki na Kòrsou tambe Garnier kier hasi un kontribushon positivo na nos medio ambiente. E Beach Cleanup day aki ta wòrdu organisá no solamente pa yuda konsientisá e hóbennan di Miss Curaçao Teenager, sino tambe pa demas miembronan den nos komunidat realisa e importansia di tene nos medio ambiente limpi. E Beach Cleanup day di e aña aki lo tuma lugá djadumingu awor dia 22 di Yüni na Caracasbaai kuminsando for di 07’or di mainta Kada partisipante lo tei huntu ku su tim pa asina huntu logra hasi e área di Caracasbaai manera nobo atrobe. Miss Teen Ambiental Garnier 2013 di Aruba, srta. Stephanie Selena De Andrade lo ta di bishita na Kòrsou i nos lo tin e plaser di tin e tambe durante di nos Beach Cleanup Day di e aña aki. Mas ku klaro bo yudansa tambe lo por ta di sumo importansia. Pues e invitashon ta bai na grandi i chikí, pa bini djadumingu awor na Caracasbaai i duna un man. Úniko kos ku bo mester trese ta pañanan konfortabel, alegria i positivismo i hopi gana pa yuda. E partisipante ku logra un mihó impakto huntu ku su tim durante e Beach Cleanup day aki djadumingu awor lo gana e premio di Miss Garnier 2014.