KRALENDIJK-YUNI; Resientemente Digicel Bonaire a renobá su patrosinio ku e organisashon di Special Olympics; di e forma aki siguiendo un tradishon di años ku e kompania tin- no únikamente na Boneiru sino den tur merkado na unda e ta operá. “Nos muchanan spesial semper a forma parti di nos aktividatnan, nos promoshonnan, trabounan komunitario i nos kompania. E kompromiso di Digicel pa ku Special Olympics ta genuino i duradero”, esaki di akuerdo ku relashonista públiko di Digicel Bonaire. Digicel Bonaire su patrosinio na e organisashon ta bai kompañá ku un laso di koperashon ku ta keda sostené den transkurso di henter aña; asina por menshoná ku e muchanan di Special Olympics ta risibí aporte spesial pa partisipá na entre otro kampeonatonan internashonal, aktividatnan di formashon personal i sosial, pero tambe por konta ku un sosten inkondishonal di maneho di e empresa. Den luna di Mart último a tene e popular ‘Walk-a-Thon’. Tur fondo ku a keda rekoudá durante di e ‘Walk-a-Thon’ ta bai pa kubri e partisipashon di e atletanan na weganan olímpiko ku otro aña lo ta na Los Angeles. Aunke ku e fundashon ta risibí $10,000 – Digicel su aporte na Special Olympics Bonaire no ta únikamente finansiero ya ku e kompania ta partisipá aktivamente na eventonan di e organisashon. “E meta prinsipal tras di nos patrosinio ta pa brinda nos atletanan spesial oportunidat di desaroyá den forma positivo i kultivá un deseo serka e atletanan pa destaká den nan deporte apesar di nan limitashonnan. Nos ta enkurashá komunidat di Boneiru pa sigui sostené e fundashon i asina hasi nan soñonan tambe realidat”, asina relashonista públiko pa Digicel Bonaire a finalisá. Riba fotonan athuntu por haña un impreshon di e momentu ku e donashon na Special Olympics a keda realisá na ofisina di Digicel Bonaire den Kaya Grandi. Por mira gerente general di Boneiru, Sr. McMahon i empleadonan di Digicel kompañá pa atletanan spesial.