Djabièrnè último Focco Lunsingh Scheurleer, presidente di Rotary Club Willemstad (RCW) a entregá yabi di un kas nèchi drechá i di fèrf na e personanan hóben ku ta bai biba aden. E kas ta ofresé un ambiente dushi i sigur na un mama di 19 aña i su yu di 3 aña. Tur dos ta partisipá den e proyekto di biba ku guia di Kas Bruder Pius, un organisashon lokal ku ta guia mamanan hóben. E mama hoben akí su mayornan no tei mas: su tata a fayesá ora e tabata chikitu i su mama a bandoná Kòrsou ora e tabatin 12 aña. Aki e por biba trankil i kaba su estudio SBO i ta gui’é stap pa stap pa e bira independiente. E proyekto“hands on” aki ta kuadra perfekto ku e metanan di servisio di RCW, ku di tur manera ta empeñá pa promové desaroyo duradero di hóbennan. Kas di Bruder Pius ta parti di Fundashon Guia, Eduká i Forma i ta un sentro di akohida pa mucha muhé na estado i mamanan hóben. Direktora Els Alders van de Geijn ta splika: “ Nos ta hasi e mamanan akí independiente i resistente i ta yuda nan desaroyá e abilidatnan nesesario pa kuida i eduká nan yu bon. Asina nan ta bira konsiente di e responsabilidat ku nan tin komo mama soltero i por dil kuné mihó tambe. E sentro ta traha ku un plan bon pensá i un plan di guia den fase i ta ofresé e mucha muhénan un ambiente di biba i un klima pedagógiko kaminda struktura, disiplina, formashon, kuido, edukashon i informashon ta pará sentral. Di e 7 kasnan riba e tereno di e proyekto di biba ku guia,, tres tabata den un estado “mas o ménos”. Di eseinan a drecha unu. Promé ku e “make-over” tabatin hinter un trayekto. Arthur Rosaria, presidente di Rotary Willemstad den pasado ta konta: “Promé nos a bai wak un par di bia, entre otro ku un amigu kontratista pa inventarisá kiko tur tin mester pa drecha  e kas di tal manera ku mama i yu por biba aden. Despues a traha un presupuesto. Ku yudansa di kontribuidónan manera Kooyman i EWT despues a kumpra tur material di konstrukshon nesesario i promé ku a hinka e kas den un bachi nobo a saka e kushina bieu pone pafó. Diaconie& Caritasraad Abcoude (Nederland) tambe a kontribuí na realisashon dje kas akí pa medio di un donashon dirèkt na Kas di Bruder Pius. Al final e serviceclub a traha 3 dia kompletu na e proyekto di drecha kas akí i tabatin mas o ménos 25 miembro di Rotary enbolbí. Esakinan na nan turno a haña yudansa di algun boluntario i klùsernan ku eksperiensha  di Ronald McDonald House Charities Curaçao Foundation. E resultado ta papia pa su mes: un kas nechi di fèrf ku sala i kamber drechá, hèkwèrk nobo, un dak drechá, un baño renová i un kushina kompletamente renová fresku i bunita. Diaz: “Nos ta kontentu ku nos por yuda e mamanan hóben di Kas di Bruder Pius di forma práktiko, i e aktividat “hands on” akí ta fortalesé nos mes konekshon ku otro tambe.” Den futuro sigur sigur nos lo hasi tipo di proyektonan asina  akí mas regular. Potrèt: di tres persona na man robes Els Alders van de Geijn, direktor di Kas BruderPius, ta risibí di Focco Lunsingh Scheurleer, presidente di Rotary Club Willemstad, yabi di e kas renová.