WILLEMSTAD-  5 di ougùstùs 2013 – Ofisina di Turismo di Kòrsou (CTB) na Colombia a risibí invitashon pa forma parti di e feria Gatronómica Santa Ana kual a tuma lugá resientemente na Colombia. E feria aki ta un festival kulinario den kual ta krea un ‘showcase’ pa e produkto ku kada pais tin pa ofresé kombiná ku presensia na diferente evento ku a wòrdu tené durante hinter luna di yüli. Mirando e bon trabou ku nos Curaçao Culinary Team a hasi na Miami durante e kompetensia di Taste of the Caribbean 2013, CTB a aserka CHATA / Curaçao Hospitality Training Foundation pa dos miembro di Curaçao Culinary Team 2013 partisipá na feria Gatronómica Santa Ana i representá Kòrsou. Durante nan estadia na Colombia tabata tin diferente presentashon i demostrashon kaminda nos maestronan kulinario; Ashohary Juliana i Adriyel Lourens a demostrá nan abilidatnan. Pa duna un toke spesial na e presentashon durante e feria Gatronómica Santa Ana a prepará un menú special pa laga tur esnan ku a partisipá na e feria disfrutá di algu netamente di nos. Ámbos chef a kompetí kontra diferente isla den Karibe durante e kompetensia di Taste of the Caribbean 2013 i a risibí basta premio di taya, pues sin niun duda Kòrsou a sá di brinda un presentashon riba nivel internashonal. Ademas di esaki a konta ku un evento spesial en konekshon ku e re- inougurashon di e vuelo Curaçao – Bogotá di DAE. E evento aki a wòrdu presensiá dor di ehekutivonan di DAE, representante nan di CTB i e tim kulinario di Kòrsou. CTB i ámbos representante di Curaçao Culinary Team: Ashohary Juliana i Adriyel Lourens por mira bèk riba un partisipashon eksitoso den feria Gatronómica Santa Ana.