Pone 25 lider hóben entre 14 pa 18 aña 3 dia huntu, i bo ta mira un futuro bunita pa Kòrsou.Yen di konfiansa, sabiduria, entusiasmo, dinamismo, vishon, koperashon, inspirashon i dedikashon. Esakinan ta djis ehempel di karakteristíkanan ku e partisipantenan hóben a demostrá durante e programa di Rotary Youth Leadership Award (RYLA) di Rotary Club Willemstad, den wikènt di 6 pa 8 di yüni. Tur aña Rotary Club Willemstad ta organisá RYLA. Ta pidi sigur 35 skol pa skohe un máksimo di 3 alumno a base di nan prestashon, aktitut i envolvimentu den komunidat. Durante 3 dia profeshonalnan ta guía i train e  hóbennan akí pa loke ta nan kalidatnan di liderazgo durante diferente tarea ku nan mester kompletá ku otro. Durante esaki un hurado ta opservá nan. E hurado tin e tarea difísil pa nominá 5 lider pa e Leadership Award. A habri e wikènt di RYLA ku un diálogo tokante liderazgo. Akinan ta train prinsipalmente skuchamentu; e partisipantenan ta skucha otro su eksperiensia i ideanan tokante liderazgo. Remarkabel tabata ku pa e lidernan hóben akí, nan role model mayoría bia ta un líder ku ta biba den anonimidat, manera por ehempel un mama soltero, na lugá di e lidernan polítiko, artístiko, sosial i spiritual ku aktualmente ta aktivo. E téknika di diálogo den un tempu kòrtiku ta krea un laso íntimo entre e hóbennan ku no tabata konosé otro promé ku esei. E grupo a sinti su mes uní mes ora después di e diálogo i a pasa e sobrá dianan komo amigu. E di 2 parti di e djabièrnè ta un svavenger hunt kaminda den grupo e hóbennan mester a kumpli ku tareanan desafiante. Akinanan por a mira  koperashon dirigí riba resultado  den akshon. Riba e di 2 dia, djasabra, ta informá e partisipantenan tokante prinsipionan di liderazgo i kon influenshanan kultural ta hunga un papel den esaki. Tambe nan ta sera konosí ku téknikanan di komunikashon manera LSD-Techniek: luisteren, samenvatten en doorvragen (skucha, resumí i sigui puntra). Djasabra anochi e partisipantenan por speed date ku miembronan di Rotary Club Willemstad. E hóbennan por puntra e profeshonalnan akí tur kos tokante nan edukashon, profeshon i naturalmente  tokante nan eksperiensia ku liderazgo. E aña akí a klousurá e djasabra anochi ku 2 role model hóben di Kòrsou, Djuric Virginie (Rey di tumba 2013) i Deva Dee Sillee di Curacao Cares, tur dos èks alumnonan di MIL. Nan a konta tokante nan eksperiensia- i metanan. Djadumingu a klousurá RYLA ku un inspirational speaker, i otorgashon di e RYLA Award. E aña akí kontadó di kuenta  Sheila Payne a klousurá e wikènt ku un presentashon eksitante. Ku su kuenta di E baka maluko el ilustrá e kalidatnan di un líder berdadero. E partisipantenan tabata hopi entusiasmá tokante e 3 dianan akí i tur e eksperiensianan nobo ku nan a pasa aden. No a papia hopi di tokante  teoría di liderazgo, RYLA ta enfoká mas riba “siña hasiendo”. Hopi di loke e hóbennan a sina a sali tambe for di nan mes, for di nan mes ambiente i ekperiensia personal. Durante RYLA nan a bira mas konsiente di nan kapasidatnan pa loke ta liderazgo, maske nan sa ku den sierto aspektonan nan ta poko tímido ainda.

Nominadonan i ganadó di RYLA 2014.

E entusiasmo i plaser ku e hóbennan a partisipá kuné na RYLA, ta mustra ku e proyekto ta yena un nesesidat importante; hóbennan no solamente ke skucha i sigui, nan ke  i por dirigí nan mes tambe! Antó ta esaki mester stimulá. E lídernan hóben ku a partisipá na e wikènt akí a haña material fuerte pa por sigui desaroyá mas aleu. Durante e 3 dianan akí e miembronan di hurado a opservá  i husga e partisipantenan a base di kalidatnan di liderazgo. Pero e trainernan tambe por a duna nan opinión ken tabata e mihó lídernan di grupo. E partisipantenan mes tambe por a nominá un persona via di un enkuesta anónimo. A base di esaki a skohe 5 nominado. Di e 5 nan akí Ryanne van der Linden di 18 aña tabatin e mihó kalidatnan di liderazgo. E a risibí RYLA Award 2014 . Sigun e hurado, Ryanne a distinguí su mes den e siguiente kalidatnan di liderazgo: inspirá i motivá, mustra inisiativa, i bon komunikashon. E sobrá 4 nominadonan ta: Fayanne Constancia (Radulphus College) Dijonalis Harris (Albert Schweitzer) Quency Martes ( Maris Stella), Alexandra Sille (Kolegio Alejandro Paula). Pero pa e trainernan i hurado di RYLA al final tur partisipante ta líder. Tur hende a desaroyá fuerte den e wikènt, i e hurado ta spera ku nan ta keda desaroyá nan mes kome e futuro lídernan ku Kòrsou mester. “ Un líder sa ki ora guía i mustra otronan kaminda. Un líder ta skucha bon, ta motivá otronan pa partisipá, tin vishon, i sa di transformá esaki den akshon” sigun Rita Merkies na anunsio di ganadó di e Award. E Award ta konsistí di un award plaquette, i partisipashon kompletamente reglá na un programa di Rotary Leadership na Washington USA, òf otro kaminda.

Spònsernan di RYLA 2014.

RYLA ta un evento ku Rotary Club Willemstad ta organisá i ku ta posibel ku yudansa di spònser. Rotary Club  su spònsernan Oro ta: Avila Hotel, ENNIA i MCB. Spònsernan Plata ta: EY, Burgers & Fun a Loi Notarissen, AFAS, Insel Air. Spònsernan Brons ta: Saint Tropez, WannaGo Outdoors, Brett Russell (fotografie) , GR8 Group Public Relations & Marketing (media) i Youth Magazine. Coach i trainernan ku a koperá sin niun interes ta: Smart Skills (Willem Jan Stokhof), Wanna go outdoors, Hubert Martha, Sharleen Alberga, Remy de Haas, Maya Mathias, Sheila Payne, Djuric Virginie, Deva Dee Silliee i tur miembro di RCW. Foto: Winnaar Ryanne van der Linde met RCW incoming president Rita Merkies-Groothuizen.