Lamentablemente nos a haña e siguiente notisia ku Sonny Rollins pa motibu di salú lo no por ta presente na Curaçao North Sea Jazz. Sonny Rollins: “Due to a recent illness, I am unable to perform my upcoming concert in Curacao. I am disappointed but I hope to recover sooner than later and I want to thank my many fans who are so loyal to me.” [“Debí na resiente kebrante di salú, mi no por presentá pa mi próksimo konsierto na Kòrsou. Mi ta desapuntá, pero mi ta spera di rekuperá pronto miéntras mi ke gradesí mi tantísimo fanátikonan ku ta asina leal na mi.”] Na nòmber di nos bishitantenan nos a dese’é un pronto rekuperashon. Pa reemplasá Sonny Rollins un otro leyenda masha grandi di Jazz lo presentá den nòmber di: Herbie Hancock. Pianista i kompositor Herbie Hancock ta konta komo un di e nòmbernan importante den Jazz di awendia. Na 1960 el a keda deskubrí dor di trompetista Donald Byrd, i e tabata forma parti di Miles Davis’ Second Great Quintet i e ta konosí komo un di e arkitektonan importante di e asina yamá sonido ‘postbop’. Hancock ta keda move kontinuamente entre jazz akústiko i elektróniko miéntras e ta usa hopi influensha di soul i funk. Último dékada e ta sumamente produktivo. El a gana no ménos ku dieskuater Grammy Award, i su álbun River: The Joni Letters na 2008 a keda elegí hasta komo  Álbum di aña den kategoria general, siendo e di dos álbum di jazz di tur tempu. Hancock su último álbum The Imagine Project ta di aña 2010.