WILLEMSTAD- 9 yüni 2014:- Djabièrnè último den sala di reunion di Ofisina di Turismo di Kòrsou (CTB) a tuma lugá un reunion ku diferente aktor enbolbí ku e tópiko di seguridat di turista. Meta di e reunion tabata pa huntu diskutí i deliberá riba e problemátika i yega na posibel solushonnan. E reunion a konta ku partisipashon di representantenan di CTB huntu ku Kuerpo Polisial Kòrsou, Ministerio Públiko, CARMABI, Uniek Curaçao, CHATA, ROP (ántes DROV), Hawk Eye Security, Ministerio di Salubridat, Medio Ambiente i Naturalesa, Curaçao Airport Holding i bestür di POLITUR. Primeramente a duna un bista di e diferente inisiativanan ku CTB a bini kuné e añanan tras di lomba pa asina halsa e nivel di seguridat di e turista. Mester indiká ku diferente di e inisiativanan aki a i ta dunando resultado den sierto arianan. Seguidamente a inventarisá e problemátika aktual, kaminda a kumbiní pa evaluá medidanan pa alsa seguridat di e turista. Konsiderando ku turismo ta un di e pilarnan importante di nos ekonomia tur e aktornan presente ta di opinion ku mester hasi algu pa atendé e problemátika. E aktornan presente a duna diferente posibel solushon riba término korto, mediano i largu. Durante di e simannan ku ta bini e grupo lo sigui reuní pa asina yega na un plan di akshon konkreto ku lo mester keda presentá despues na Gobièrnu. CTB ke pidi komunidat su koperashon pa ora nota algu pa mesora avisá outoridat. Huntu nos por yuda kombatí e problemátika aki i yega na un pais seif pa nos mes i pa nos bishitantenan.