Plataforma Bèrdat Históriko, ku den koperashon ku otronan tin 15 aña ta organisá Ruta Tula, pa medio di e komunikado aki ke duna su opinion tokante e figura di Tula den e pelíkula Tula, the revolt, ku a lanta basta diskushon den nos komunidat. Nos lo limitá nos na e figura di Tula, i lo no trata otro aspektonan di e pelíkula ku no ta kuadra ku bèrdat históriko, e.o. e ponensia ku e pelíkula ta habri kune, bisando ku tabata imposibel hui for di Kòrsou. Nos ta konsiente ku un pelíkula, kontrali na un dokumental, ta brinda e kreadó(nan) sierto libertat artístiko, p.e. pa krea un partner pa Tula. Pero libertat artístiko hamas i nunka por hustifiká ku ta deformá e figura di nos héroe nashonal Tula, manera  a sosodé den e pelikula Tula the revolt. Di kon nos ta bisa ku a deformá e figura di Tula den e pelíkula? 1)      E pelíkula ta presentá un Tula ku a bringa  pasó el a hañ’é fòrsá, un Tula  ku no tabata ke rebelion, ku tabata ke pa tur kos sosodé na un manera legal i pasífiko i ku su meta prinsipal tabata pa papia ku gobernador. E vershon akí di e figura di Tula sigur no ta basá riba ningun dokumento verídiko. Loke sí dokumentonan di archivo (1795, De slavenopstand op Curacao) ta mustra ta; -ku Tula a liberá 22 persona sklabisá ku tabata enkadená  na Kenepa, esaki tabata  e promé akto ku tabata kompletamente “ilegal” segun leinan kolonial di e tempu ei! Tula a pone lei kolonial un banda! -ku e rebeldenan a poderá di lanthùisnan (e.o. Santa Krus), esaki ta otro akto “ilegal”. -ku e rebeldennan a poderá di arma, no solamente dje doñonan di plantashi pero tambe  arma (entre nan kañon) den e fòrtinan na Kenepa I Santa Krus ku tabata pertenesé na e poder kolonial. E akto aki no solamente tabata “ilegal”, pero e ta mustra tambe bon kla ku nan a prepará nan mes pa un konfrontashon armá. Nan a kue arma pa bringa kune! I no pa nan kana prònk kuné! -ku tabatin konekshon ku e lucha na Haiti: na Porto Marie a kanta kantika franses i un luchadó haitiano a papia franses, na Ser’I Neger tambe un luchadó a papia franses. I ta bon konosí  ku na Haiti ta un lucha  armá tabatin ku  a fòrsa Fransia abolí sklabitut. Ta e ehèmpel ei Tula i su kompañeronan a sigui ora nan a arma nan mes pa bringa pa libertat. -por ultimo: ora e momentu a yega ku mester a bringa, Tula i e otro luchadónan a bringa, ku hopi balentia, nan a hasi esei pegá ku saliña di Jan Kock, na Porto Marie, na Ser’I Neger I despues den mondinan den besindario di Seru Kristòf. E úniko konklushon ku nos por saka for di dokumentonan ta ku Tula konsientemente a skohe e kaminda di rebelion, di lucha armá, ku e meta pa logra libertat!  T’esaki ta e bèrdat históriko! 2)       E pelikula ta presentá Tula komo lider di un rebelion ku no tabata prepará i planiá. Hasta ta laga Tula bisa ku e ta bai Santa Krus pa topa ku su partner. Figurabo! Pero ora nos bai wak dokumentonan, nos ta mira ku wèl tabatin planifikashon i ku sigur dos siman promé ku e rebelion a kuminsá,  tabatin preparashon i a pone kontakto ku diferente plantashinan na Bandabou. Dokumento ta mustra ku tabatin palabrashon ku durante rebelion lo manda sierto  señal for di Santa Krus pa e luchadónan. Ta e preparashon aki a pone ku den korto tempu a logra ku hopi persona sklabisá a djòin e lucha. Un otro prueba di planifikashon ta e plan stratégiko ku e luchadónan  a pone den práktika: nan a hasi Porto Marie nan kuartel general, a okupá Ser’I Neger i lanta riba e seru  tranké di piedra komo barikada kontra e trupanan kolonial, a usa Ser’I Neger komo sitio pa retirá si no por wanta mas na Porto Marie, a manda un grupo Seru Grandi pa wanta avanse di trupanan kolonial, hasta a manda un spion pa buska informashon den siudat tokante moveshon di e enemigu, tabatin luchadó na Skarlo . Tur esakinan ta mustra klaramente ku no ta den kayente di lucha a improvisá kiko mester hasi. Tabatin un plan prepará, adelantá! Pa nos di Plataforma Bèrdat Históriko e figura di Tula den e pelíkula Tula, the revolt, no ta e Tula real ku nos por saka for di dokumentonan ku ta mustra nos un lider ku vishon, konosementu, determinashon, ku a enkabesá un rebelion ku tabata planiá, un lider sin miedu ku a duna su bida pa e kousa di libertat. Nos ta spera ku e diskushon i interes ku a lanta pa Tula I e lucha pa libertat di 1795, lo sirbi komo estímulo pa nos amplia e diskushon riba puntonan manera; importansia di konosementu di nos historia; e nesesidat pa hasi investigashon sientífiko (e.o. pa haña sa mas di Tula); e lugá ku historia mester tin den nos enseñansa. I ku e diskushon lo ta un estímulo pa nos bai mas leu ku papia so, pero tambe pa tuma akshon pa yuda  krea mas konsenshi  históriko.

Plataforma Bèrdat Históriko

Stanley Quirindongo, presidente                    Jeanne Henriquez, miembro i historiador