… e biaha aki tabata Polis, personal di Restorant, Hotèl, Resort i komplehonan di apartamento…

WILLEMSTAD- 30 di yüli 2013:- Ofisina di Turismo di Kòrsou (CTB) ta orguyoso di anunsiá ku 25 persona mas a finalisá e training di ‘Dushi Hende’ ku e éksito. E training aki tin komo meta prinsipal pa konsientisá nos hendenan riba e importansia di nos komportashon pa ku nos mes i pa ku e turista pa asina kontribuí na kresementu i desaroyo positivo di turismo di Kòrsou. Durante di e training fasilitá dor di e kompania Experientia, a train personanan den e sektor di entre otro; Polis, Restorant, Hotèl, Resort i komplehonan di apartamento pa komprondé i apliká e 6 balornan di ‘Dushi Hende’ (Hospitalidat, Servisial, Responsabilidat, Orguyo, Integridat i Honestidat) atraves di diferente tarea práktiko. Ta importante pa menshoná ku primeramente 84 persona a finalisá e ‘Dushi Hende’ training ku éksito. Ta trata aki di e grupo di Shop Attendants, Taksista, Car Rental Agents i empleadonan di CTB, pues te ku aworakí un total di 109 persona a logra finalisá e ‘Dushi Hende’ training. Na final di e training tur e partisipantenan a risibí un sèrtifikado i un pin di ‘Dushi Hende’. Despues di temporada di vakashon lo kontinuá ku e trainingnan di ‘Dushi Hende’, di e forma aki Ofisina di Turismo di Kòrsou ta kontinuá ku e esfuerso pa enkurashá no solamente esnan den sektornan di servisio pero pueblo di Kòrsou en general pa apliká i kompartí e mensahe di e kampaña ‘Dushi Hende’. Pa tur esnan ku ta aktivo riba Facebook kòrda ‘like’ e página di Facebook di ‘Dushi Hende’.  www.facebook.com/DushiHende