Willemstad – yüni 2014: E aña akí, pa di 5 biaha ENNIA ta spònser prinsipal di e tan konosí Team Tennis Tournament, organisá pa Curaçao Team Tennis Foundation.  Dia 2 di yüni a klousurá e di 16 edishon di e turnamento, ku diferente ganadó den klasenan A, B, C, i supklasenan. E turnamento ta konosí komo un evento deportivo sosial, kaminda hungadónan di tènes amatùr por topa otro riba e kanchanan. E aña akí 18 tim ku total 110 tenista a kompetí ku otro den e turnoi ku a dura 2 siman. E aña akí hopi tenista kual tin hopi tempu sin tènes a partisipá, loke a sòru pa partidonan eksitante. Den klase A e tim di Retired Ten-Fu Masters ku kabesante Rashid Winklaar i e hungadó hóben prometedor Dimitri Celestina tabata muchu fuerte pa  e tim di kontrinkante. E kampionnan di 2013, e tim di klase B Merrel Team ku kabesante Nel Raven mester a entregá nan título e aña akí na e tim fuerte di Maui Bottse, Gomperts Cooling ku un skor di 25-23. E tim di Cisco Roep, Bandolino den klase C1 ku su hungadónan fuerte a konkistá e título ganadó. Komo último e tim di “Salseros” den rònt di “Counsolation” a gana den klase C2. Durante e seremonia di premio, Robert Martis di Curaçao Team Tennis Foundation a gradisí tur partisipante i tambe gerensia di ENNIA pa nan konfiansa den e evento. Leslie Peterson, tambe miembro di e organisashon di Team Tennis a gradisí RCC pa a pone e kanchanan di tènes disponibel. Ryan Breedijk, direktor financiero di ENNIA, durante su diskurso a enfatisá kon importante deporte ta pa un komunidat salú. Esaki ta e motibu tambe ku ENNIA  ta sostené diferente otro proyekto deportivo den komunidat.