Isla (Chile) a titulá kampeon, Brandweer (Ghana) sub-kampeon i Coca Cola (Hapon) a sali na di tres lugá

WILLEMSTAD- KOPA MUNDIAL KOMERSIAL organisá pa Atletanan di MCB i patrosiná pa Maduro & Curiel’s Bank, Coca Cola i Heineken a konose masha hopi wega di Futsal sumamente interesante riba e fechanan 28,29,30 i 31 di mei ku a tuma lugá na Johan Cruijf Court. Un total di kasi 100 wega di Futsal maskulino i femenino a keda hungá riba e fechanan ariba menshoná. Pa loke ta trata e kategoria maskulino, 32 kompania, kual kada unu a representá un di e 32 paisnan ku ta partisipá den Mundial FIFA 2014, a batayá fuerte kontra otro. Den e kategoria aki despues di un wega final sumamente interesante, e fuerte ekipo di Isla ku a representá e pais Chile a titulá kampion derotando Brandweer ku a representá Ghana. Coca Cola ku a representá e pais Hapon a gana di Curacao Airport Partners ku a representá Honduras pa asina bai ku e premio di terser lugá. Ekiponan ku a sali kampion, sub-kampion I terser lugá a risibí un bunita kopa i tambe algun kaha di Heineken opsekiá pa Distribier. Pa loke ta e sekshon femenino Komersial, Bestuurs College a titulá kampion derotando SBAB1 i MCB a gana SBAB2 i keda na e di terser lugá. Den sekshon femenino Kompetitivo, Inter  Willemstad a gana di Hubentut Fortuna i titulá kampion. Victory Queens a keda na di terser lugá. Tur e ekiponan ku a gana premio a risibí un bunita kopa. Direktiva di Komishon pa Atletanan di MCB (KOMPA) na nòmber di tur atleta di MCB ta gradisí Gerensia di Maduro & Curiel’s Bank pa e konfiansa i e sponsorship. Tambe Direktiva di KOMPA ta gradisí Coca Cola i Heineken ku tabata e partnernan di e evento super eskitoso aki i Kooyman, Wimco, Sedreko i Licores Maduro ku a koperá pa hasi e evento aki posibel. Direktiva di KOMPA ta felisitá tur e ekiponan ku a kai den premio i alabes gradisí tur kompania/ekipo pa nan partisipahon i kontribushon. Por ultimo un danki grandi ta bai pa tur fanatiko ku a bishitá e evento Mundial Komersial.