‘Kantidat di Pasahero di United Airlines ta subi drastikamente ku 68.66%.’
Despues di kompilashon i analisis di informashon estadistiko obtene via di aeropuerto Internashonal di Bonaire, TCB por komparti e resultado di e prome kwartal di aña 2014. E sifra nan ta basa riba yegada nan internashonal i domestiko entre prome di yanuari i 31 di mart 2014. Buelo nan for di Aruba of Korsou ta wordu konsidera komo domestiko. Mientras ku buelo nan internashonal ta konstitui esnan ku ta origina for di Houston i Newark ku United Airlines, di Atlanta ku Delta Airlines i for di Amsterdam ku KLM i Arkefly.
USA:
Total di yegada for di Merkaden prome kwartal di e aña aki tabata 7,871 pasahero.
Na 2013 den e mesun periodo aki a bini un total di 6,154 pasahero. Esaki ta representa un oumento di 27.90% bishitante kompara ku 2013. E oumento substanshal aki ta direktamente relashona ku e kapasidat riba buelonan ekstra di United Airlines. Durante luna di yanuari United tabatin buelonan semanal ekstra den wikent for di Newark manteniendo e buelo di Houston na unu pa siman. Den februari tabatin 2 buelo for di ambos siudat usando un Boeing 737-600 ku ta karga 160 pasahero.
Europa:
E total di yegada for di Europa den prome tres luna di aña tabatin un subida respetabel di 7.19%. Total kantidat di pasahero tabata 9,796 kompara ku 9,139 den 2013. E subida ta resultado di entre otro buelonan extra di Arke Fly i ticketnan speshal di KLM i Arke Fly. Adishonalmente Boneiru a risibi bastante promoshon den prensa Hulandes via di esfuersonan di merkadeo di TCB i tambe di OLB.
Latino Amerika y Regional:
Aunke Insel Air a transporta kasi 20% mas pasahero kompara ku e prome kwartal di 2013, aeroliña nan regional a mira un bahada di 8.90% kompara ku 2013. Esaki ta nifika un bahada di trafiko interinsular di 2,436 pasahero. Ahinda e kapasidat di asiento perdi después di stopmentu operashonal di DAE i Tiara Air no a keda yena door di Insel Air i Divi Divi Airlines ku aktualmente ta e uniko dos aeroliña nan regional ku ta bishita Boneiru. Den Latino Amerika TCB ta trahando huntu ku operadornan di biahe i sentronan di buseo pa sigi trese gruponan henter aña pa Boneiru.
Konklushon:
Generalmente mirá por konklui ku pa e prome kwartal e kantidat di pasahero a keda mas o menos igual, debi na e kapasidat limita riba rutanan regional. Total nos a risibi 42,603 bishitante entre prome di yanuari i fin di mart kompara ku 42,665 den 2013. TCB ta premira ku pa e aña aki lo tin un kresementu positivo di turismo internashonal. Proyekshon pa Europa ta un kresementu di 5 pa 10% mientras Norte Amerika lo krese ku 20 pa 25% den 2014. 