T’asina ku TeleCuraçao a kumpra e derecho di transmishon pa televishon serka IMC ku ta International Media Content Ltd, kual ta e agensia ku tin e derechonan di FIFA pa área di Karibe. Banda di e derecho di televishon, IMC a inkluí 4 derecho mas pa TeleCuraçao. Pues konkretamente, TeleCuracao tin derecho di transmishon pa:

• Televishon (den e kaso aki TeleCuraçao)
• Cable (den e kaso aki TDS)
• Radio (den e kaso aki TCFM)
• Satelite (kual ta un derecho ku nos lo no hasi uso di dje)
• Derecho di Closed Circuit

TUR E DERECHONAN AKI TA KONTA TANTU PA KORSOU KOMO BONEIRU:

DERECHO DI TRANSMISON DI TELEVISHON:

Esaki ta enserá ku TeleCuraçao ta e uniko televishon na Korsou I Boneiru ku por transmití e World Cup 2014.  TeleCuraçao lo transmití tur e weganan for di Veneto.

Derecho di Cable lo ta den man di TDS. Esaki ta nifiká ku TDS por pasa futbòl riba su kanalnan i atraves tambe di TeleCuraçao.

E derecho di radio lo ta di TCFM.

Pero TeleCuraçao lo pone e derecho di transmishon di radio optenibel pa tur radio na un preis abou òf kontra un ‘barter deal’. Sinembargo, a base di eksigensianan atrobe di FIFA, nos mester firma un akuerdo ku kada radio pa garantisá ku kada radio na nan turno, ta kumpli tambe ku e eksigensianan ku FIFA ta imponé riba TeleCuraçao.

Derecho di sirkuito será.

Esaki ta e derecho tan diskutí di bar, restorant i hotèlnan. TeleCuraçao a tene un konferensha di prensa siman pasá pa splika kon ta bai eksplotá e derecho aki, pero hustamente pa motibu ku tabatin algun punto no muchu kla, no a sali dilanti i kuminsá kobra. Den un statement ku nos a haña awe por eskrito di IMC, ta ratifiká ku TeleCuraçao tin e derechonan di transmishon i ku TeleCuraçao por eksplotá e derecho di Closed Circuit. Esei ta nifiká, ku por ehèmpel sí TeleCuraçao ta transmití for di Veneto, Veneto por komersialisá e transmishon sin niun problema. FIFA no ta permití niun otro establesimentu komersialisá e evento, pero kontrali na loke nos a kere anteriormente, FIFA no ta permití TeleCuraçao ‘sub license’ otro establesimentunan tampoko ! Bou di komersialisashon FIFA ta komprondé establesimentunan ku ta hasi propaganda pa bin wak WK den nan establesimentu. Pues loke sí ta permití ta, ku por mustra e futbòl den negoshinan, pero sin hasi propaganda, pone stul ku mesa èkstra, pantaya èkstra etc. TeleCuraçao a disidí ku nan ta kumpli ku tur e eksigensianan legal di FIFA, pero TeleCuraçao lo no ta esun ku ta bai kontrolá pa FIFA. Ta keda na kada establesimentu riba nan mes pa informá nan mes di e eksigensianan di FIFA i kumpli ku esakinan riba nan propio responsabilidat.