Willemstad- Djamars atardi den ballroom di Curacao Marriott Beach Resort and Emerald Casino tabata kaminda ku Dushi Magazine ku plaser a hasi introdukshon ofisial di e tremendo produkshon di We are the World- Curacao. We are the world ta un tema di un kansion produsí pa Quincy Jones i Michael Omartian i skibí i kantá pa e legendario Michael Jackson i Lionel Richie. E mensahe prinsipal di e kansion ta indiká ku mundu henter mester uni pa asina trese kambionan positivo. Di mes manera Dushi Magazine ker a trese e idea aki na Kòrsou mirando ku últimamente tin sierto kosnan menos positivo den notisia na Kòrsou i ta momento pa nos uni i pone un paro na esaki.

Dushi Magazine, ku e intenshon di reparti e mensahe positivo aki en konekshon ku e sertamen di Beyesa Miss Curacao World ku a tuma luga Djasabra último, dia 31 di mei. Dushi Magazine komo organisadó di e sertamen aki, ta kere firmemente den e parti humanitario di e programa i pa e motibu ei a duna kada partisipante un enkargo pa adoptá un proyekto di nan eksoho kaminda nan lo hasi obra di karidat pa un instituto of un grupo di persona. E proyekto aki tabata yama Beauty With a Purpose of beyesa ku un próposito. Kiobi Emerenciana a resultá ganadó di e proyekto humanitario aki.

Pa promové e videonan di Beauty With a Purpose, e obranan di karidat i amor pa nan prohimo di e partisipantenan I alabes relfeha e bon komunidat di Korsou, Dushi Magazine a bini ku e tremendo idea pa uni artistanan lokal pa adaptá e video di We are the World pa asina produsi un vershon pa Kòrsou.

Un danki spesial na Gibi Doran pa a tene e idea duru i duna su sosten na e proyekto. Un danki spesial na Michael Bianchi kende a para na kabes di e obra pa dirigí e proyekto di WATW-Curacao i konudusi’é na e éksito ku e ta awe. Sin Michael Bianchi, e obra aki lo no tabata posibel.

Un danki na Vio Sambo Films kende tabata na enkargo di filmashon di e artistanan den studio i editá e videonan di BWP di kada partisipante pa asina inkorporá esaki den e video final.

Un danki na tur artista ku a duna nan aporte na e obra inkreibel aki ku a wòrdu presentá live pa promé biaha durante e obra di introdukshon na e anochi final di Miss Curacao World Djasabra ultimo dia 31 di mei den exhibition hall di WTC:

Danki imenso na  Aisha Lucas-Randy Leroy Cordelia-Raynor Laufer-Heinrich Pieter-Ramil Cecilia-Mason van Siechem-Amos Balentien-Djuric Virginie-Tito Doran-Anairia Nivelac-Url Isenia-Givienca Clotida-Giltaly Doran-Jenny Virginia-Veanira Reed-Tahnee Jane- Gilmar Freitas. Kada un di e personan ku nos a menshona a yuda hasi di e proyekto aki un éksito rotundo!

Un biaha Mas danki na tur hende ku a aportá na e video especialmente Michael Bianchi. Na ken durante e konferensia ku prensa na Marriott hotel, miembronan di Dushi Magazine huntu ku e partisipantenan di Miss Curacao World a hasi entrega oficial di e CD di We Are The World- Curacao i batisa e CD alabes.

Pa tur esnan ku no a haña e oportunidat pa disfrutá di e produkshon ku ya a yega 15000 view riba youtube, sinti liber di bishitá e kanal di youtube di dushi magazine of bishitá e página di Facebook di Dushi Magazine i asina mira pa bo mes ki talentoso nos yunan di Kòrsou ta.