…. 15 piesa riba produkshon nobo!….

WILLEMSTAD- YULI- 2013: Ta asina leu ku Dreams su CD ta riba merkado; e kompakto titulá ‘KOMT GOED’ a wòrdu hopi antisipá pa fanatikonan di Dreams i tur amante di bon músika. Pikero, ta mira atras na un par di luna di hopi dedikashon i lucha pa por pone un CD ku no ménos ku 15 piesa riba merkado,” Awendia e opinion tokante un CD full grabá den studio ta varia, pero dia ku Dreams a keda lantá mi a primintí mi mes di para semper pa kalidat, pues ta mi prioridat pa ofresé nos fanatikonan un CD grabá, mesklá i produsí ku standartenan haltu”. E CD ta kontené 15 piesa, for di kual algun ya kaba a wòrdu mandá radio komo aperitivo i asina kuminsá antisipá e produkshon. Mas álue Pikero ta sigui splika ku a pone un seyo spesial na e CD pa por garantisá su originalidat i asina protehá e produkshon di pirateria, ya asina tur fanátiko por ta sigur di ta kumpra un CD original. Pikero ta finalisá gradisiendo, “Nos ke yama danki primeramente na Papa Dios, pa duna nos e oportunidat pa produsí un CD mas. Un danki na nos famianan, prensa en general, tur DJ di Kòrsou, Aruba, Boneiru, Ulanda i rònt mundu na unda ku papiamentu ta wòrdu papiá, toká i bailá. Danki na Club Bananas, Amstel Bright, Little Holland, tur promotor i empresa ku durante aña ta kontratá nos pa deleitá nan fiesta, evento òf aktividat. Danki na pueblo di Kòrsou den su totalidat, nos gradisimentu semper. Hot Flavour, Malibu, Beste Fans Crew nos stima bosnan.  “KOMT GOED” ta un afirmashon ku kosnan lo bira mihó…no ta importá e situashon òf momentu difísil. Den un ‘farándula di bataya’ na unda ku e kosnan no ta fásil, pero tòg tur dia, nos di Dreams ta lanta ku animo pa sigui ofresé nos arte, nos músika i tur nos dedikashon. P’esey mes nos ta dediká esaki na tur nos fanatikonan ku ta stret bai ku nos, tur momentu….na Abo ku por ta enfrentado un situashon òf momentu difísil, animo! KOMT GOED! Un danki na tur músiko i kantante di Dreams. “Guys, nos a bolbe logra”. Danki pa tur boso esfuerso i dedikashon. Kerido fanátiko, “Primi ‘play’ laga GG, Ray, Remi, Amos i Richi Rich deleitabo ku Dreams su piesanan di mas nobo, CD #3 stail’i djaya’banda!”. Despues di un eksitoso promé edishon di Dreams Beach Tour 2013 djadumingu último na playa di Parasasa, siman ta habri ku CD nobo! Por hasi menshon ku e produkshonnan ta riba merkado kaba. Fanatikonan por keda pendiente via di medionan di komunikashon i e página di Facebook di Dreams.