Willemstad  – Djamars dia 30 di yüli pa 8 or di anochi riba Freewinds lo bai tin un konsierto pa rekoudá fondo pa Parke Tropikal. Karchinan ta solamente 25 florin i ta optenibel durante di ora di ofisina na Parke Tropikal. Señor Giovanni Atalita i Freewinds a ofresé e konsierto aki spesial pa Parke Tropikal i riba nan manera ta kontribuí pa adelanto di nos Parke Tropikal. Direktiva nobo di Parke Tropikal huntu ku e manager di parke señor Hubèrt Isenia ta trahando hopi duru pa realisá e metanan ku nan tin na bienestar di e parke i e bestianan. Tur esaki a base di un masterplan pero ku mester di fondo finansiero pa por realisá. Banda di esei tin e gastunan tambe pa trabounan agudo ku mester tuma lugá pa drecha situashon di e parke i e kouchinan. Parke Tropikal despues di hopi aña ku a keda para ketu pa e delaster 2 añanan a bin ta demostrá ku e tin derechi di eksistensia. Banda di esei ta poko ta e kamindanan ku nos muchanan por rekreá di un manera sano i grátis. Ta hopi fásil pa bisa ku mester pone mas bestia pero mas bestia ta nifiká mas sèn. Sèn ku aworakí e fundashon no ta disponé di dje. E bestianan aworakí ta kome bon i salu i e kuido médiko ta optimal. Ta komunidat di Korsou mester kuida loke nos tin. Ta pidi pa un i tur respetá e área i e bestianan, tene limpi, i no kibra mata òf tira kos den kouchi di bestia. No ta permití baiskel, scooter, skateboard etc den parke. Hopi bochincha i korementu rònt den parke tambe ta agitá e bestianan i ta hasi nan hopi krepchi. Ban mustra ku nos tur ta Bon Yu di Korsou i respetá e reglanan vigente di Parke Tropikal. Banda di fondonan finansiero e parke mester di hopi yudansa di boluntario pa trabounan di ferf, plantamentu, guia di mucha i hopi otro kos mas. Riba Facebook un i tur por sigui e desaroyonan hopi positivo di Parke Tropikal Curaçao Zoo & Nature Reserve.

Pa mas informashon tokante di Konsierto Bestial pa Parke Tropikal djamars dia 30 di yüli riba Freewinds por tuma kontakto na 7360188 òf 5295151. Karchi ta solamente 25 florin i optenibel durante ora di ofisina na Parke Tropikal na Chuchubiweg.