Selikor ta partisipá ku e siman aki lo surgi algun retraso den e skema di rekohé shushi di kas. Esaki debí na algun desperfekto ku a surgi ku nos ekipo di trabou. Personal di Selikor ta hasiendo su máksimo esfuerso pa aliviá e situashon aki den un tèrmino di tempu kòrtiko. Durante e siman di 22 pa 26 di yüli klientenan lo por eksperensiá algun tardansa den nos servisio di rekohé shushi. Den kaso ku Selikor no alkansá yega pa duna servisio riba e dia kustumbrá, nos trùk lo pasa hasi e kònteiner bashí su siguiente dia. Ta pidi tur habitante pa tene kuenta ku esaki i laga nan kònteiner pafó di kurá pa ora e trùk
pasa e por bai ku e shushi. Dor di skùif un tiki den e skema di rekohé shushi Selikor ta trata pa no laga ningun bario keda hopi dia ku nan shushi. E kompania lo traha ku dos sheft pa asina garantisá ku e siman aki mes e retraso ta keda solushoná. Klientenan ku tuma nota ku Selikor a pasa den nan bario pero no a bai
ku nan shushi por tuma kontakto ku nos departamentu di Servisio na Kliente na 46-limpi, 465-4674. Pa loke ta trata barionan kompletu ku no a risibí servisio, nos departamentu di Rekohé Shushi di Kas ta na altura di esakinan i tin nan den planning pa nan haña servisio. Selikor ta pidi su diskulpa pa eventual inkonbeniensia ku e kambio den servisio aki por trese kuné i ta pidi su klientenan nan indulgensia pa e situashon ku a surgi.