Willemstad-  Un bon públiko, hasiendo preguntanan alkaso, a asisti na e tres seshonnan di informashon tene den kuadro di introdukshon di Onroerendzaakbelasing (OZB.)  E siman aki e taksadónan ta kuminsá ku nan trabou di taksashon den e shete promé barionan.  Ta trata di e barionan di Jan Sofat, Jan Thiel, Janwe, Blaauw, Hofi Abou, Girouette i Klein Kwartier. Miéntras tantu Inspekshon di Impuesto di Korsou ta intensiva su kampaña di informashon afin ku pueblo tin e oportunidat pa risibí informashon alkaso di e impuesto aki ku a remplasá  Grondbelasting for di promé di yanuari 2014.  Pa mas informashon tokante OZB i e proseso di implementashon por bai riba e website www.ozb.belastingdienst.cw of tuma kontakto ku Inspekshon di Impuesto di Kòrsou. Durante di e anochinan di informashon tene na Biblioteka Públiko, Sentro di Bario Tera Kòrá i Montaña por a nota ku tin un gran interes pa e tópiko di OZB.  E interkambio entre e públiko i e panelistanan a perkurá pa klarifikashon di vários aspekto di implementashon di e lei.  Pregunta i kontestanan mas hasi ta keda inklui riba e lista di pregunta ai kontestanan riba e website speshal pa e lei aki.  Mientrastantu Inspekshon di Impuesto ta intensiva su esfuersonan pa urgi públiko pa interesá i tuma nota di e introdukshon di e lei aki atraves di un kampaña di informashon.  Un rekomendashon ta bai na un i tur pa bishita a website speshal kaminda entre otro tin un kalkulado kaminda kada persona mes por kalkula kiko e impuesto aki por nifika pa nan situashon spesifiko. E siman aki e taksadonan ta drenta e promé barionan. Lo balorá tur asuntu inmóbil ku ta kai bou di OZB (i ku no ta eksonerá) pa stipulá nan balor. Ta spera ku e taksashon akí lo bai tuma algun aña en bista di e gran kantidat di asuntu ku mester balorá.  Inspekshon di Impuesto pa e trabou akí a kontratá diferente taksadó outorisá ku den ekipo lo pasa den bario i tereno. Komo prinsipio e taksashon lo tuma lugá di pafó; es desir lo no pidi bo pa laga e taksadó drenta pa mira paden. E taksadónan por mustra nan legitimashon.  Despues di e taksashon e pagadó di impuesto ta risibí un karta di inspektor den kua ta anunsiá e balor nobo i den kua ta bisa tambe ku por entregá kontra-argumento, eventualmente produsiendo dokumento di prueba (Rapòrt di taksashon, èts.) E pagadó di impuesto lo haña algun siman di tempu pa hasi esaki. Meskos ku pa e “Grondbelasting” anterior, pa OZB tambe e plaso di 5 aña ta konta den kua ta sólamente den sierto sirkunstansha ta revisá e balor, p.e. si tin kambio di e inmóbil. Ke men ku e promé término di e balor pa OZB ta e periodo di dia promé di yanüari di 2014 te ku dia 31 di desèmber di 2018.