… Renaissance Mall & Rif Fort ku aporte…

WILLEMSTAD Yüli– Dia 2 di yüli último Renaissance Mall i Rif Fort a selebrá dia di Bandera tur afó ku un dia yená ku aktividat pa famia kompletu. Durante e selebrashon, e 10 partisipantenan di Miss Teenager a haña oportunidat di rekoudá fondo di un manera spesial pa Fundashon Sinta Ros.  

Durante un segmento di  modelahe kombiná ku sertámen di Miss Renaissance Mall i Rif Fort i Miss Sinta Ros,  partisipantenan di Miss Teenager a aserka tur presente na Renaissance Mall i Rif Fort pa hasi un donashon na Fundashon Sinta Ros. Ta bon pa menshoná ku e montante di donashon tabata un montante liber pues kada persona por a duna loke nan tabata deseá. Despues di aproksimadamente 20 minüt e partisipantenan a entregá nan kaha di donashon pa asina e organisashon por a hasi konteo di e donashon total na Fundashon Sinta Ros ku tambe tabata tei presente ku nan booth di informashon pa krea konsientisashon di kanser na pechu. Resientemente Ms. Nashaira Balentien Miss Renaissance Mall & Rif Fort , Selina Gumbs, marketing coordinator a hasi entrega di un check na balor di Naf. 1595.00 na Fundashon Sinta Ros. E inisiativa di Renaissance Mall & Rif Fort pa rekoudá fondo pa Fundashon Sinta Ros a resultá eksitoso. E Fundashon aki ta un fundashon importante den nos komunidat, ku ta brinda sosten i informashon na tur esunnan ku ta sufri di kanser na pechu i esunnan ku a sobreviví e enfermedat. Renaissance Mall i Rif Fort ta orguyoso di huntu ku partisipantenan di Miss Teenage por a hasi un donashon na Fundashon Sinta Ros.