WILLEMSTAD- 22 di mei 2014:- Representantenan di Ofisina di Turismo di Kòrsou (CTB) huntu ku sektor priva resientemente tabata di bishita na Repúblika Dominikana pa partisipá na Vacaciones CTN Expo-Feria 2014. E feria di biahe aki a tuma lugá di 15 pa 18 di mei último na sentro komersial Sambil i a konta ku un kantidat grandi di bishitante. Vacaciones CTN Expo-Feria ta un di e ferianan di biahe di mas grandi na Repúblika Dominikana organisá pa Caribbean Traveling Network (CTN) ku tin tantu, un kanal di televishon komo e revista Puro Turismo. E feria a wòrdu tene durante 4 dia konsekutivo i tabatin komo meta prinsipal pa brinda un oportunidat eksklusivo na e komunidat biahero pa probechá di ofertanan spesial i yuda plania e vakashon di nan soño. Durante un desayuno i presentashon di e produkto Kòrsou ku CTB a organisá djabièrnè 16 de mei, pa mas ku 30 agentenan di biahe, Embahadora di Reino Hulandes Sra. Marijke van Drunen Littel a informá tur presente ofisialmente ku for di 14 di aprel último residentenan di Repúblika Dominikana por bishita Kòrsou ku un visa Merikano, Kanades òf Schengen. Ademas Repúblika Dominikana ta eksperensiando un kresementu signifikante den su ekonomia, pues esaki ta e momentu apropiá pa CTB posishoná Kòrsou fuerte den e merkado turístiko Dominikano, esaki sin lubidá e buelonan di InselAir ku ta 4 biaha pa siman entre Kòrsou i Repúblika Dominikana. 
Ta importante pa suprayá ku promoshonnan grandi i di impakto pa Kòrsou mester bai kompaña ku partisipashon di sektor priva. Pa e motibunan aki mester gradisí tur sobra miembronan di e tim di Kòrsou ku a partisipá huntu ku CTB na Vacaciones CTN Expo-Feria 2014 kual ta; Acoya Hotel Suites &Villas, Sunscape Curaçao Resort, Spa & Casino, Santa Barbara Beach & Golf Resort Curaçao, Academy Hotel Curaçao, InselAir i un grupo musikal enkabesá pa Ephrem J. CTB ta probechá kada okashon pa presentá nos produkto den e merkado turístiko i duna lo máksimo pa kumpli ku e meta prinsipal, ku ta esun di keda posishoná Kòrsou komo un destinashon faborito den Karibe.