WILLEMSTAD – Djabièrnè 6 di yüni próksimo lo tuma lugá inisio di 50Hours Live pa aña 2014. E transmishon bibu akí lo ranka sali 3 or di mèrdia ku e ophetivo pa rekoudá fondo pa diferente proyekto di bon kousa. Pa e okashon aki e transmishon lo tuma lugá for di e ‘Kas di Glas’ na Wet & Wild ku ta patrosinadó prinsipal di e evento. E akshon lo kontinuá pa 50 ora konsekutivo i lo terminá djadumingu 8 di yüni pa 5 or di atardi.

Ripitishon di eskitoso 50HoursLive

Aña pasá 50HoursLive, e akshon pa rekoudá fondo pa bon kousa,  a tuma lugá na e restorant ‘New York’ na Bapor Kibra (na Playa di Sea Aquarium). E dinámiko empresarionan Marro Pietersz i Lauw Jacobs a uni forsa ku Rotary Club Curacao, i e patrosinadó prinsipal Wet’nWild, algun otro empresa, organsisashon i persona kende nan tur a kontribuí na e éksito di 50HoursLive 2013. Durante 50 ora konsekutivo Marro, Lauw i algun amigu a hasi un programa di radio bibu pa 50 ora konsekutivo durante kua empresa i personanan por a hasi nan kontribushon pa bon kousa.  Por a skucha i mira e transmishon via diferente radio emisora i kanal di televishon lokal. E kontribushonnan a yega un gran total di ANG 400.000 ku a bai pa proyektonan pa yuda muchanan den nesesidat.

Kiko 50 HoursLive ta bai hasi ku e fondo rekoudá na 2014? 

E aña aki e organisashon di 50 HoursLive a tuma e desishon ku, banda di aloká e  sèn rekoudá pa kompra di ünifòrm i artikulonan di skol pa muchanan di ménos rekurso, tambe sostené finansieramente un proyekto piloto pa un skol VSBO despues di oranan di skol. E proyekto aki ta ser ehekutá pa Fundashon Desaroyo i Progreso ku lo selektá un grupo di mucha di ménos rekurso di un skol VSBO pa esakinan risibí guia di tarea (huiswerk) i tambe brinda nan oportunidat pa hasi aktividatnan kreativo, ekspresivo  i deporte durante oranan despues di skol.

E fin di siman di 6-7-8- di yüni 2014?

Durante e fin di siman di 6, 7 i 8 di yüni benidero tur hende ta bon biní na  ‘Wet ’n Wild’. Lo tin entretenimentu pa hende grandi na enkargo di agrupashonnan musikal i artistanan lokal i internashonal. Djasabra anochi lo tin un subasta interesante siguí pa un presentashon di e popular agrupashon musikal ‘Trafassi’. Pa mucha lo tin atrakshonnan manera bouncer, un tsunami slide i dunkpool  na kua tur mucha por partisipá grátis.

Paalzitten

Un atrakshon nobo na  50HrsLive ta ‘paalzitten’. Esun ku sinta mas tantu ora riba e palu no solamente ta gana un bòn di balor di ANG 1000.00 di Boolchand’s pero alabes por indiká promé ku su partisipashon na kua bon kousa e kier hasi un donashon di ANG 10.000!  Riba e paginá di Facebook di ‘50Hours Live Curacao’ e e website  http://www.rotarycuracao.org tin e fasilidat ku por baha e formulario di inskripshon.

Mas informashon?

Por risibí mas informashon via di e partnernan di media Dolfijn FM, Hoyer 1 & 2,  Telecuracao , TDS kanaal 26  & 81 i RTV7Holland. Alabes Extra, Amigoe, Antilliaans Dagblad i Ultimo Noticio lo pone avisonan. Via Facebook  ‘50 Hours Live Curacao’; tambe por sigui e programa.