Oranjestad, Aruba 21 di mei 2014: No ta desconoci cu e 12 candidatanan di Miss Teen International 2014 ta hopi activo, hayando diferente seminario pa amplia nan conocemento como tambe preparacion pa nan certamen di beyesa. Recientemente e participantenan a haya un tabatin e placer pa tambe duna nan un tremendo seminario tocante cuido di cabey cu e productonan di beyesa Garnier, cu ta reconoci mundialmente. Mirando cu e cantidad di participante ta hopi, a opta pa parti e grupo den 2, unda cu Lizayra Tromp-Polak, Sales & Marketing Manager Medicosmetics Aruba N.V. a elabora riba varios aspecto y importancia di e linea di producto Garnier pa cuido di nan cabey. E marca Garnier tin 110 aña di existencia, pues un historia hopi amplio y interesante, unda cu a cuminsa cu un ‘hairtonic’. E candidatanan a keda impresiona pa haya sa di e origen y con tur cos a cuminsa, ya cu Garnier ta conoci como un producto hopi efectivo, cu prijs razonabel y facil pa haya tur caminda. Lizayra a trata tocante tur e diferente producto cu e linea Garnier tin pa ofrece e diferente tipo di cabey y necesidad, como tambe con duro e marca aki ta traha riba e parti di conscientisacion y campaña pa cuida nos medio ambiente. E productonan di Garnier ta conoci tambe pa ta uno di componente natural. E participantenan a haya un bista amplio con Garnier por yuda nan cu cuido di nan cabey y con pa dun’e forza pa briya, pa crece, pa ta bunita of pa e no daña mas. Como participante di miss, nan mester por luci un cabey fuerte y bunita y p’esey mes ta di sumo importancia pa nan ta na altura di e beneficionan y accion di cada producto di Garnier, cu ta percura pa finalmente nan tin un cabey fuerte paden y briyante pafo.