Djamars 23 di yüli na waf na Otrobanda.

E aña aki e barku krusero Freewinds na diferente manera i na diferente momento ta para ketu na e echo ku ta 25 aña pasá ku nan a inisiá gira regional kaminda Kòrsou a fungi komo haf di kas. Huntu ku Curaçao Jazz Foundation (CJF), ku tin ya 24 aña ‘a bordo’, djamars awor (23 di yüli) nan ta ofresé un konsierto spesial pa selebrá e logro aki. Pa e okashon aki tambe Freewinds Band bou di guia di e guitarista originalmente Franses Patrick Zagury ta prepará un programa variá di jazz i músika relatá kontemporáneo. Pa esaki a invitá un elenko di artista lokal, entre nan e kantantenan Eurydice “Dichi” Wit, Debby Beaujon i Nathaly “Pushi” Mardenborogh i e perkushonista famoso rònt mundu Pernell Saturnino. Tin mas artista invitá programá, pero esei ta keda un sorpresa te na último momento.

CJF-Freewinds
E koperashon entre CJF i Freewinds a kuminsá na 1989 ku un presentashon na bordo di e músiko i kompositor Chick Correa. Den tur e biahanan ku CJF tabata envolví  a invitá kada be atrobe artista lokal (prometedor i ya establesé) pa presentá huntu ku e integrantenan di e profeshonal Freewinds Band. Di e manera aki ta kalkulá ku mas ku 80 artista lokal a haña chèns pa demostrá nan abilidatnan musikal den e konsiertonan periódiko den sala Starlight na bordo di e barku krusero. Semper a tene e preis di entrada pa e konsiertonan mensual aki abou (15 florin), pero e parti mas grandi di e rekoudashon a bai pa un skala amplio di institushonnan ku ta hasi trabou importante den e sosiedat di Kòrsou. Asina aki mas ku 50 organisashon lokal di tur índole a logra probechá di e konsiertonan aki riba Freewinds.

Djamars awor e konsierto ta kuminsá 8 or di anochi. For di mitar di 8 ta laga wéspetnan invitá subi abordo na e trapi na un di e wafnan den Otrobanda. Entrada pa e konsierto spesial aki e biaha aki ta grátis.