WILLEMSTAD – Desde awor en adelante por troka Fun Miles na Curawex (Curaçao Water Experience) tambe, un partner nobo di Fun Miles ku ta ofresé biahe nan inolvidabel riba laman, ku posibilidat pa hasi buseo i snòrkel na e sitionan bou di laman di mas bunita di Kòrsou. Komo kampaña di introdukshon, te ku 11 di ougùstùs próksimo, miembronan di Fun Miles por disfrutá di un biahe relahante pa Klein Kòrsou (riba djadumingu) i oportunidat pa snòrkel na Boka Samí (riba djasabra) pa un tarifa hopi atraktivo.
TOKANTE CURAWEX
Un kapitan ku masha hopi eksperensia ta e persona ku a lanta Curawex, ku ta abreviashon pa ‘Curaçao Water Experience’. E kompania ta para garantia pa seguridat, bon servisio i pa disfrutá di bida riba i bou di laman. Téknikonan sertifiká ta kontrolá tur e boto nan i Curawex ta hasta fasilitá prosedura di seguridat na diferente otro tour operator Marítimo. Na Curawex tur kos ta drai rondó di e kliente, na ken ta duna servisio kompletu, pa disfrutá di biahe nan tropikal inolvidabel. Hopi kos ta posibel: for di un biahe relahante riba laman pasando bahia nan di Banda Bou, te na kore den un ‘rib’-speedboot super lihé, òf for di un dia relahante na Klein Curaçao te ku kursonan di buseo efektuá pa instruktornan kapasitá.
BENEFISIO I FUN DEN LUNA DI YÜLI
Te ku 11 di ougùstùs Curawex tin dos oferta di introdukshon masha spesial pa miembronan di Fun Miles: un biahe di un dia pa Klein Kòrsou òf un trep pa snòrkel na Boka Samí! E biahe pa Klein Kòrsou ku Curawex ta e mihó forma pa konosé i disfrutá di e isla aki. E biahe ta inkluso un dushi BBQ i kos pa bebe. E biahe ta tuma lugá tur djadumingu saliendo 07:15 or pa regresá 17:00 or. Por buk pa un biahe pa Klein Kòrsou pa solamente 7.750 Miles òf 2.500 Fun Miles plùs 100 Florin pa persona. E biahe pa snòrkel na Boka Samí ta e manera ideal pa gosa di e bista úniko di e refnan di koral i ta tuma lugá riba djasabra di 9.00 or pa 01.30 or. Esaki ta inkluso un desayuno i almuerso. E ta realisabel pa únikamente 4.450 Miles òf 2.000 Fun Miles plùs un pago adishonal di 49 Florin pa persona. Yen ta yen; pues ta rekomendabel pa reservá lihé via curawex.com òf e number di telefon 461 7274.