Sorpresá ku 25,000 florin kèsh:

Willemstad –Yüli:  Manera ya kaba ta ampliamente konosí, e aña aki ENNIA ta di fiesta, e kompania ta selebrá su 65 aniversario. Den kuadro di su selebrashonnan ENNIA ta rifa kada kuartal 25,000 florin entre tur kliente ku renobá nan seguro of sera un seguro nobo na Kòrsou, islanan BES, St. Maarten i Aruba. Sra. Nadine Trinidad ta e di dos ganador di e ENNIA Loteria Aniversario. Djamars mainta a sorprendé na su kas ku e chèk simbóliko. Un tim grandi di ENNIA a bishitá Sra. Trinidad na su kas pa duné e grato sorpresa. Na momento ku Sra. Trinidad a risibí un representante di ENNIA, e tim di grabashon di Tele Curaçao a yega serka i tabata e momento perfekto pa divulgá e gran sorpresa. E tim di ENNIA a sorpresá Sra. Trinidad ku hopi konfetti. “Mi ta masha kontentu ku e notisia ku ami ta e ganador di e NAF 25,000 kèsh, Esta un bon notisia boso a trese p’ami. Mi no por kere ku mi tin asina tantu suerte. Tur hende ku mester di un seguro por sera un seguro na ENNIA ku chèns di gana e premio aki meskos ku ami”, asina Sra. Trinidad a ekspresá den su entusiasmo. Sr. Reinald Curiel, direktor komersial di ENNIA a entregá Sra. Trinidad e chèk simbóliko. Su siguiente dia, Sra. Trinidad a risibí e chèk ofisial for di man di gerensha di ENNIA durante un resepshon na ofisina di ENNIA na Gorsiraweg 6. Durante e resepshon Sr. Gilbert Martina, direktor general di ENNIA a dirigí palabra di gratitut na Sra. Trinidad. “Komo kliente di ENNIA bo a yuda nos krese ku awe nos por selebrá nos di 65 aña. Danki pa e konfiansa den nos kompania i sigui ku nos pa hopi aña mas”. Kada kuartal tur kliente di ENNIA ku renoba nan seguro of ku sera un seguro nobo na ENNIA tin oportunidat di gana 25,000 florin kèsh. Subi e websáit www.ennia.com/ennia-jublieum-loterij i mira e reglamentunan. Via di korant, radio, televishon i e websáit di ENNIA ta duna tur informashon di e sorteonan. E próksimo sorteo  di ENNIA su Loteria Aniversario ta tuma luga di 3 òktober 2013. Riba foto  athuntu; Sra. Nadine Trinidad huntu ku Sr. Gilbert Martina, direktor general di ENNIA na momentu di entregá di e chèk di 25,000 florin. Masha Pabien!