Curaçao Lions Club a disidí di duna SEHOS un yudansa ku renobashon di e flur di e koredornan di e promé piso di e edifisio di hospital na Roodeweg. Esei lo por tuma lugá asina e linolio ser pidí i entregá. Tin nesesidat pa kambia e flur konserniente den e hospital. No ta  rekomendabel pa keda lapi e partinan gasta. Pa motibunan di estétika i prinsipalmente pa motibu di higiena. Lamentablemente e hospital no tin e medionan finansiero pa karga e kambio aki kompletamente. Curaçao Lions Club ta konsiderá komo un servisio espesial na e hospital i na nos komunidat en general pa kooperá ku kambiamentu di e linolio en kuestion. Un parti di su Fondonan pa Mehoramentu di Komunidat kual ta destiná pa e proyekto aki ta ser finansiá ku un donashon supstansial kual a ser risibí for di e kompania di krusero konosí, Royal Caribbean. E aportenan di Curaçao Lions Club i di Royal Caribbean a ser oumentá ku donashonnan adishonal di respektivamente United Insurance Company i Fundashon Bon Intenshon te na un montante di fl. 40,000. E montante total, inklusive ponementu di e linolio a ser kalkulá na mas o ménos fl. 100,000. Entre tantu djaweps atardi 4 di yüli 2013 den hospital na Roodeweg un chek pa e aporte konhunto aki a ser entregá simbólikamente na e Direktor di SEHOS, señor Javier Hernandez. Athunto nos ta pone un foto di e akontesimentu aki ku gustosamente nos lo ke mira publiká. Nos ta gradisí na nòmber di tur konserní pa e kooperashon risibí. Na nòmber di Curaçao Lions Club tabata presente e Presidente ku a kaba di tuma enkargo dia 1 di yüli, señor Dave Liqui-Lung, e Presidente saliente, señor Gibi Goilo i señor Felipe Croes, miembro di Hunta Direktiva, kende ta koordiná e donashon na nòmber di Lions Club. Al final mester menshoná ku hospital a skohe pa usa e material marmoleum*. Marmoleum* ta e marka registrá di Forbo’s linolio. E tin un kualidat partikular ku e ta evitá multiplikashon di sierto mikroorganismonan. Diferente instansha a investigá i konfirmá esaki sientifikamente, entre otro TNO na Hulanda for di 1998 i resientemente na 2009 tambe Profesor Curtis Gemmel, Profesor Emérito di Infekshon di Bakteria i Epidemiologia di Universidat di Glasgow. Nos ta sita su deklarashon: “Marmoleum* di Forbo ta un defensa potente i natural pa flur, i ta kontra e fuentenan mas frekuente di infekshon atkirí den hospital, manera MRSA, i lo mi rekomendá Marmoleum* pa flur di hospitalnan”.