CBA Television i Dolce Band tambe a djòin

WILLEMSTAD.- SOV Brantwer Kòrsou ta kontentu di por anunsiá ku tur kos ta kla pa e Firefighters Hunt 2014. Ayera durante oranan di atardi, tur partisipante a pasa tuma nan T-shirt pa garantisá nan partisipashon den e hunt aki, ku tei bira otro for di e otro ‘speurtocht’ nan ku ya a tuma lugá.
Evento 2 dia
E Firefighters Hunt di Brantwer aki ta bai paralisá Kòrsou kompletu pa 2 dia largu. For di 8or di mainta tur grupo lo reuní den kura di Brantwer Mundu Nobo pa risibí nan desayuno. Pa 9or di mainta en punto, lo por skucha e pitu ofisial di un brantspùit ku lo marka inisio pa e gruponan kuminsá ku búskeda rònt Kòrsou. E firefightershunt lo konta ku diferente tarea den kual e partisipante lo sera konosí ku trabounan di Brantwer Kòrsou, pero tambe paisahe i partinan bunita di Kòrsou.
Transmishon
Un di e kompanianan i planta di televishon ku a duna su aporte i sosten na Firefighter’s Hunt ta CBA Television. CBA Television mesora na momentu di a skucha di e hunt, a disidí di djòin e tim di Brantwer i hasi e evento grandi. Durante djasabra i tambe djadumingu próksimo, tur persona na kas por yuda e timnan ku ta partisipá pa yega na puntonan èkstra. Úniko kos ku mester hasi ta sintonisá CBA Television djasabra i djadumingu for di 9’or di mainta pa bo gosa di e hunt aki.
Dolce Band
Un di e gruponan di entertainment ku ta esun aworakí ku tur hende ke skucha ta Dolce Band. Firefighters Hunt ta kontentu di por anunsiá ku djadumingu awor, 5or di atardi lo tin ambiente den kura di Brantwer na Mundu Nobo,na momentu ku Dolce Band deleitá tur hende durante entrega di premio. Dolce Entertainment Band a sa di koperá grátis ku Brantwer pa e bon kousa aki, pues Brantwer Kòrsou ke invitá pueblo di Kòrsou kompletu pa pasa i bin gosa den kura djadumingu próksimo.
Spònsernan
Maske situashon ekonómiko no ta esun mihó, tòg SOV Brantwer Kòrsou kier gradisí tur spònser òf instansia ku a koperá ku nos, pa e Firefighters Hunt bira unu eksitoso. Lo bai tin diferente premio i for di awor nos ke yama un danki spesial na entre otro Girobank, MCB Bank, Refineria Isla, Stacey’s Embroidery, TDS, Santa Barbara Resort, UTS, Curoil, Shemidah’s Agencies, Distribier, Pepsi, Coca Cola, Margil Party Rentals, Leanez, Danny’s Groceries, Kortijn Ijs, Autocity, Building Depot, Zenitel, Good Friends, Atroma i tambe tur otro ku durante di e último dianan aki nos a bati na nan porta pa un yudansa òf aporte.
Partisipashon
Ya vários tim a inskribí i tambe a tuma T-shirt, pero tin timnan ku na último ora no por partisipá mas. Pa tur esnan ku awor a haña e smak pa e wikènt aki, hasi algu diferente i ser turista riba bo mes pais, por pasa awe djabièrnè, entre 6’or pa 8’or di anochi na Brantwer Mundu Nobo, inskribí,tuma T-shirt i tambe hasi nan pago. Pa mas informashon por yama na 687-1263.