WILLEMSTAD – Djamars atardi a tuma lugá un enkuentro ku prensa na e restorant The Grill King den Punda, durante kua Emilka Model Management a informá di lansamentu di Kòrsou komo plataforma di moda pa Karibe i Sur Amérika. Despues di trabounan di preparashon durante 7 aña, porfin a yega na e produkto final ku kua Kòrsou lo promové Kòrsou komo e sentro pa tene eventonan di moda i beyesa den Karibe. Ku esaki lo inisá alabes un industria nobo pa Kòrsou lo mester generá divisá, krea mas kupo di trabou pa nos komunidat i atraé profeshonalnan di rònt mundu pa tene nan eventonan riba e tereno aki na Kòrsou. Pa e evento Curaçao Model Search ku lo tuma lugá djasabra 31 di mei lo usa Breedstraat Punda komo e pasarela pa e show di moda. Invitadonan spesial pa e okashon ta e famoso modelo internashonal, kende ta aktor i presentadó di e programa tan gusta “Make Me a Super Model” Tyson Beckford. Otro invitado spesial ta e famoso fotografo i modelo Nigel Barker. Pa promé biaha nan dos lo ta huntu den un espektákulo ku ta Curacao Model Search. Curaçao Model Search ta plataforma for di kua modelonan lokal por inisiá un karera Internashonal. Emilka Model Management, huntu ku Señora Christine Lewis di Campaign Management di Inglatera, kende ta un konsehero i agensia renombrá den Fashion Industry,  a yega na un akuerdo ku L’Oreal Paris ku e modelo skohé e aña aki durante CMS ta firma un kontrato di 3 aña ku pa dje forma ei inisiá su karera ofisial komo modelo profeshonal komo modelo di e kompania di renombre mundial aki. E evento Curaçao Model Search tin sosten di diferente partner lokal entre kua Curaçao Tourist Board ku ta duna soten na e proyekto pa posishoná Kòrsou den spòtlait internashonal komo un sentro di eventonan di moda. Un otro partner ku lo kana e trayekto kompletu e aña aki ku e eventonan di moda na Kòrsou organisá pa Emilka Model Management ta Cpost International ku lo bai lansa fin di luna aki un servisio nobo pa komunidat di Kòrsou i islanan di Karibe Hulandes.