Djasabra 10 di mei 2014, kandidatanan pa e sertamen di Miss Curaçao World a tene un kompetensia di deporte. Komo parti di e organisashon mundial di Miss World, Dushi Magazine ta pone hopi enfasis pa prepará e kandidatanan segun reglanan internashonal. E konsepto di Dushi Magazine ta pone hopi atenshon riba e kualidatnan ku ta bai mas leu ku beyesa. Asina tur partisipante mester demostrá ku nan ta kontribuí na bon kausa den komunidat, ku nan tin talento, i ku nan tin bon kondishon di físika i salú. Pa e dia di deporte, kada kandidata a skohe un koló, den kual su fanatikonan por a uniformá pa mustra nan sosten. Bou di guia di entrenadornan Jerry Daniel, Gerard Servania i Djener Jansen, kandidatanan a prueba nan kondishon den diferente ehersisio. Entre otro, kandidatanan a prueba nan mes den kareda di 800 meter, bula kabuya, skòp bala den gol ku konsentrashon i presishon, forsa pa kologá for di brasa i hopi mas. Famia i fanatikonan tabata bon representá na Playa Boca Sami pa e okashon aki. Ku orguyo huradonan a felisitá e ganadornan durante di e resultado final:

• Ganador di Miss Curaçao World Sports Challenge, ku ta kualifiká pa 15 punto pa e sertamen final di dia 31 di mei próximo: Gwendeline Zimmerman
• Di dos lugá di Miss Curaçao World Sports Challenge, ku ta kualifiká pa 10 punto pa e sertamen final di dia 31 di mei próximo: Roëna Meijer
• Di tres lugá di Miss Curaçao World Sports Challenge, ku ta kualifiká pa 5 punto pa e sertamen final di dia 31 di mei próximo: Alexandra Krijger

Dushi Magazine, komo organisashon di e sertamen ofisial di Miss Curaçao World ta orguyoso di mantené e eventonan na mesun orden ku e organisahon mundial. Tambe Dushi Magazine ta orguyoso di e nivel ku tur e kandidatanan ta demostrá durante di e kompetenshanan aki. E sertamen final, dia 31 di mei próximo, ta primintí di bira unu hopi difisil, komo ku tin kandidatanan asina fuerte! Públiko ta keda invitá pa presensiá e evento aki na World Trade Center Curaçao. Karchinan pa e evento aki ta obtenibel na Mensing’s Caminada, Albert Heijn, Beep Beep Rio Canario, Bruna, via number di telefòn 5609591 i serka tur kandidata. Pa mas informashon, bishitá e página di “Facebook” di Dushi Magazine.