… Pueblo di Kòrsou a demostrá union durante e proyekto…

WILLEMSTAD: Por mira bèk riba un eksitoso ‘food drive’ organisá dor di Digicel na benefisio di sinku orfanato aki na Kòrsou. Pueblo di Kòrsou por a yuda Digicel ku e rekoudashon spesial te ku djabièrnè último. A klousurá e ‘food drive’ ku un dia spesial na unda ku un tim di promoshon a bai na diferente supermerkado pa fasilitá esun ku a deseá di hasi un donashon. Srta. Thessa Fleming, relashonista públiko pa Digicel ta splika “Nos a risibí un kantidat enorme di kos di bebe, kuminda den bleki i otro produktonan for di pueblo di Kòrsou; nos komunidat a demostrá union durante di e proyekto aki. Tabata bunita pa mira kon klientenan tabata yega na Digicel Biesheuvel pa entregá nan donashon, esaki ta duna un sentimentu di satisfakshon enorme ya ku koleganan di Digicel i otro boluntarionan a traha duru pa realisashon di e proyekto”. E sinku orfanatonan ku a keda benefisiá ta, Kas Broeder Pius, Casa Manita, Huize Sint Jozef, Kinderoorden Brakkeput,  i Huize Rose Pelletier. Mester hasi menshon ku durante di e proyekto aki, mundu empresarial tambe a duna un man; ta gradisí Henriquez Agencies, Kusters trading i Martijn Trading pa nan kontribushon valioso. Den e proyekto aki Digicel i nos komunidat a yuda 250 mucha/ hóben di entre 4 i 20 aña di edat, inkluyendo baby i resien nase. “Durante di e ‘food drive’ donashon di kuminda den bleki, kos di bebe i produktonan di limpiesa i higiena tabata prioridat pero nos komunidat a demostrá un kariño spesial pa nos muchanan i a surpasá tur espektativa. Nos ke ekstendé palabranan di gratitut na tur esnan ku a yuda durante di e proyekto aki. Danki na tur e supermerkadonan partisipante ku a pèrmití nos aserka nan klientenan; Mangusa Hypermarket, Mangusa Rio Canario, Albert Heijn, Esperamos i Vreugdenhill Supermarket”, Thessa Fleming di Digicel a sigui splika. Tabata djarason dia 3 di yüli último ku Digicel a hasi entrega di e produktonan ku a keda rekoudá durante di e ‘food drive’ i asina klousurá un otro proyekto eksitoso di ‘Bario Ekstraordinario’. E felisidat riba kara di e muchanan i dirigentenan di e kasnan di kuido tabata notabel. Riba kombinashon di foto por tuma nota di e  momentu di entrega.