WILLEMSTAD.- E ‘gimmick’ di djasabra último organisá pa Euphoria Management relashoná ku e konsierto di Prince Royce pa dia 14 di yüni próksimo a resultá un éksito kompletu. Benta di karchi mester a kuminsá 12’or pero e organisashon a kuminsá bende karchi mas tempran tumando na konsiderashon e kantidat di hende ku tabatin para den rei pa kumpra karchi. E animashon di e diferente radio emisoranan ku ta forma parti di e promoshon di e konsierto di Prince Royce a perkurá tambe pa tremendo ambiente i a sòru pa atraé un kantidat di hende pa bin kumpra nan karchi. E públiko ku ta premirá ku lo bishita e konsierto lo ta un bon varia. No ta solamente yu di Kòrsou a bin kumpra karchi pero hendenan di diferente nashonalidat a akudí i kumpra nan karchi pa sekshon general òf VIP Gold. Na final di atardi Euphoria Management por a mira atras riba un dia sumamente eksitoso kaminda nan a surpasá e meta ku nan a pone pa loke ta trata benta di karchi. PUNTO DI BENTA Entrante awe karchinan sekshon general pa e konsierto di Prince Royce lo ta optenibel na Beep Beep RIO, Tik Tak, Mensing’s Caminada, AH Supermarket, VdTweel Supermarket na JanThiel, Pagadero Saliña i Pòmpstashon Sta. Helena. Pa informashon i benta di i ‘VIP Gold’ i ‘VIP Platinum’ por akudí na e Prince Royce Outlet, situá den Camaleon Mall òf por yama 688-5272. Riba foto un impreshon dje dia di ‘gimmick’ djasabra último.