Pa medio di e komunikado akí Fundashon Bos di Hubentut ke kuminsá na informá komunidat di Kòrsou, ku e hóben Shurendly Maduro no tin ningun laso ku nos fundashon ni ku Parlamento hubenil (Hóben Goberná). E hóben akí den pasado na diferente okashon a aserká instanshanan den komunidat, presentando su mes komo presidente di Parlamento Hubenil, siendo ku nunka e no tabata miembro di Parlamento Hubenil. El a kuminsá hasi esei na aña 2011 i ora nos a haña sa, nos a bai kas di wela di kriansa di Shurendly, pa splika e señora kiko Shurendly tabata hasiendo. Na mes momentu nos a entregá e wela un karta, den kual nos a pidi Shurendly pa  stòp di hasi maluso di nòmber di Parlamento Hubenil.  E wela tabata hopi preokupá I a primintí ku e lo papia ku Shurendly. Siguiente paso ku Bos di Hubentut a tuma tabata un komunikado ku nos a saka pa mustra ku Shurendly no tin ningun laso ku nos organisashon ni ku Parlamento Hubenil. Lamentablemente ni  karta ni palabra di wela, ni komunikado  no a yuda, pasobra Shurendly a sigui ku su komportashon desviante.

• Na 2012 Shurendly a bishitá  Heilig Hart College na dos okashon,  presentando su mes komo presidente di Parlamento Hubenil.  Despues di e di dos bishita e kabes di skol a tuma kontakto ku Bos di Hubentut i a haña sa kiko tabata pasando. Ora Shurendly a presentá di tres bia na skol, e kabes di skol mesora a bèl Bos di Hubentut.  Direktor di nos fundashon a sali mesora bai  skol pa papia personalmente ku Shurendly i a mustr’é ku lokual e ta hasiendo no ta aseptabel. Papiando ku Shurendly  e direktor a bin komprondé  ku e hóben akí tin hopi problema personal I ku e mester di yudansa. Den un intento pa duna e hóben un man, e direktor  a proponé na Shurendly  pa e pasa na sede di Bos di Hubentut pa papia I wak kon e por  uza su abilidatnan na un manera positivo pa yuda hubentut.  Shurendly a keda  di tuma kontakto ku direktor di Bos pero esei no a sosodé. I el a sigui ku su aktonan di engaño.

• Durante un akshon di protesta di alumnonan di SGO Shurendly a  presentá na e skol pa supuestamente duna sosten na e alumnonan i na e okashon ei el a papia públikamente komo presidente di Parlamento Hubenil.  Direktor di SGO a tuma kontakto ku Bos di Hubentut pa reklamá e manera grosero i sin rèspèt ku Shurendly  a papia di gobernantenan. Na e okashon ei Bos di Hubentut a saka un di dos komunikado pa distanshá su mes públikamente di tur lokual Shurendly tabata hasiendo.
  • Na komienso 2013 Shurendly a falsifiká firma di tres miembro di parlamento di Kòrsou.  El a hasi maluzo di e firmanan falsifiká  pa e.o.  trata na engañá Konseho Insular di Boneiru pa nan risibi’é komo presidente di Parlamento Hubenil i hasta pa nan pone outo na su disposishon durante su estadia na Boneiru.  Ora voogd di Shurendly a deskubrí e plan di Shurendly pa bai Boneiru el a avisá Bos di Hubentut ku na su turno a tuma kontakto ku un miembro di Konseho Insular di Boneiru pa splika ku Shurendly no por papia na nòmber di Parlamento Hubenil pasobra nunka e no tabata miembro.  Komo ku Shurendly tabata menor di edat, e no por a sali for di Kòrsou sin konsentimentu di su voogd. Fuera di esei Konseho Insular di Boneiru tabata alertá i lo no a risibi’é.

   

  Despues di e kaso di Boneiru kaminda un biaha mas Shurendly a malusá nòmber di Parlamento Hubenil,  Bos di Hubentut a hasi denunsia na polis  pa pone un fin na e daño ku e hóben akí  tabata kousando na nos  organisashon. E mal komportashon di Shurendly a yega dje leu ei ku e señora kaminda e tabata keda, no por a tené mas den su kas.  Pa tur esnan ku tabata na altura kiko Shurendly tabata hasiendo, tabata bisto ku e hóben aki tabatin mester di yudansa  anto lihé, promé ku ta lat. Mirando gravedat di e situashon  en kuantu  komportashon desviante  di Shurendly, Voogdijraad  a pone  un reunion pa wak kiko mester hasi pa  yuda e hóben aki. Den e reunion ei tabatin representantenan di Bos di Hubentut, un representante di Ministerio Públiko, voogd di Shurendly i e señora kaminda Shurendly tabata biba.  Tur esnan ku a partisipá na e reunion tabata di opinion ku  Shurendly mester  haña  ayudo profeshonal pa su problemanan personal/mental i ku esei mester ta obligatorio. Loke a sosodé despues ta ku a hinka Shurendly  den un internat  ( New Creation)  pero ora el a kumpli 18 aña el a move bai, sin ku el a haña ayudo profeshonal adekuá.  Konsekuensia ta ku el a sigui ku su aktonan di engaño .  Aworaki atrobe Shurendly ta den notisia negativo. Un biaha mas  ta sali na kla ku e ta presentá su mes komo èks-miembro di Parlamento Hubenil, e biaha na minister van der Horst. Nos ta spera ku awor sí lo tuma e pasonan nesesario  pa pone e hóben aki komprondé ku no ta sigui tolerá su aktonan di kue hende kabes abou i hasi kos ku ta kontra di lei.  Banda di esei mester kuminsá ku e proseso pa dun’é ayudo profeshonal pa wak kon ainda por skapa e hóben akí. Pero pa esei sosodé mester tuma akshon lihé  i tur e instansianan ku ta atendé ku e tipo di kasonan aki mester bira muchu mas pro-aktivo. No pa Shurendly so pero pa e tur e otro hóbennan ku mester di ayudo.