Djasabra awó t’e dia: un kantidat limitá di karchi na 50 florin

WILLEMSTAD:- Tal manera ku a keda anunsiá durante di e konferensha di prensa djamars pasá, e djasabra aki ta un gran dia pa tur fanátiko di e konsierto ya ku un kantidat di karchi limitá a keda pone na preis spesial di 50 florin pa sekshon general. Espektativanan pa e konsierto ta haltísimo- esaki ya por a sinti e último siman tra’i lomba na momentu ku e promoshon pa e gran konsierto a ranka sali. Djasabra awó, karchinan sekshon general lo wòrdu redusí pa un solo dia na 50 florin i karchinan VIP Gold na 200 florin. Mester suprayá ku esaki ta únikamente pa djasabra dia 10 di mei próksimo. Esaki lo tuma lugá na e Prince Royce Outlet na Cameleon Mall nèt banda di Tony Romas entre 12’or di mèrdia i 5’or di atardi. E atardi lo wòrdu kompañá ku músika i entretenimentu, transmishon di radionan Mas 99, Direct 107, Mi 95 i tambe Radio Rumbera. Ta premirá ku e akohida lo ta inmenso mirando ku ta únikamente un sierto kantidat di karchi a keda pone den e spesial na 50 florin. Mesora djadumingu lo sigui ku e pre-benta regular. Pa e konsierto lo tin 3 sekshon;  General, VIP Gold i VIP Platinum: Sekshon General ta kosta 75 florin, na porta esaki lo bira 100 florin. Sekshon VIP Gold, ta kosta 250 florin, na porta 275 florin- esaki ta inkluí 2 bebida, akseso na e VIP Gold Lounge i ubikashon pará dilanti di esenario. Sekshon VIP Platinum ta kosta 350 florin i ta inkluí, ‘all inclusive drinks and snacks’, asiento na mesa riba e platinum deck, servisio di waitress na mesa i ubikashon pará dilanti di esenario. Pa informashon i pre-benta di VIP Platinum por akudí na e Prince Royce Outlet òf por yama 688-5272.Karchinan lo ta optenibel for di djadumingu na, Beep Beep RIO, Tik Tak, Mensing’s Caminada, AH Supermarket, VdTweel Supermarket na JanThiel, Pagadero Saliña i Pòmpstashon Sta. Helena.