BON BISIÑA di CURAÇAO LIONS CLUB

Willemstad – Curaçao Lions Club ta klousurá e di 53 edishon di Bon Bisiña ku éksito i ta yama danki na un i tur ku a koperá na e kolekta di komestibel mas grandi di Kòrsou. E aña aki a yuda 850 famia ku un pakete yená ku komestibel i 15 instituto.

Boluntarionan a sortea e produktonan i wardanan den dos konteiner pa después nan keda yená den pakete. Ku intermediashon di “Raad van Kerken” e paketenan bon yená di Bon Bisiña a keda reparti pa 850 famia ku mas mester di dje. E kantidat di komestibel ku a kolektá tabata hopi grandi i 15 instituto ku no ta risibí subsidio (kas di hende grandi, opvang di mucha i hóben) tambe a risibí un lote grandi di komestibel di Bon Bisiña.

Curaçao Lions Club a haña koperashon e aña aki di 12 skol, pero tambe komersiantenan ku ta hasi donashon di diferente produktonan básiko na gran kantidat. Diferente ta e kompanianan ku tambe riba nan propio inisiativa a kolektá bou di nan empleadonan. E kolekta na e dos supermerkadonan tambe a bai hopi bon.  Hopi ta esnan ku a kopera ku un donashon.

Curaçao Lions Club ta agradesido na tur ku a koperá pa e aña aki un biaha mas hopi famia i instituto por pasa dushi dianan di fiesta. Pa más informashon di Curaçao Lions Club i e diferente aktividat i proyektonan por sigui e página di facebook Curaçao Lions òf manda un email na info@curacaolions.org.