ku enfoke pa konsientisá mucha i hóbennan kiko ta un bon bisiña

Willemstad – Curaçao Lions Club pa 51 aña a tene su akshon di Bon Bisiña i a skohe pa duna mas atenshon na e meta original ku ta pa konsientisá nos mucha i hóbennan di e importansia pa kompartí ku nan próhimo komo un bon bisiña.

Ku koperashon di St. Franciscus College, St. Joris College, St. Margaretha College, Vigdis Jonckheer Mensing College i Berg Carmel College, Curaçao Lions Club a kompartí e mensahe aki ku mas ku 2500 mucha.

Alumonan di grupo 7 i 8 di e skolnan ariba menshoná riba invitashon di Curaçao Lions Club a bai wak e pelíkula “The Queen of Katwe” na The Cinemas pa despues miembronan di klup a bishitá e skolnan personalmente pa papia riba e tópiko i konsientisá e alumnonan kon nan por kontribuí. Huntu ku kabesnan di skol i maestronan, e alumnonan a ekspresá di forma artístiko kiko pa nan ta un “bon bisiña”.

Hopi ta e komestibelnan ku e alumnonan a rekoudá i pa kompletá e pakete e alumnonan mes a traha bunita karchinan di Pasku pa kompaña tur e paketenan di kuminda. Komo muestra di apresio pa e kontribushon di e skolnan na e proyekto di Bon Bisiña, Curaçao Lions Club a hasi un donashon di NAf. 1000,- na kada skol ku a partisipá.

Curaçao Lions Club ta masha agradesido na a komersiantenan ku tambe a duna un aporte balioso dor di hasi donashon di diferente produktonan básiko di kada pakete. Sin nan koperashon e kantidat di pakete i surtido ku a sera tampoko lo tabata posibel. Total e proyekto di Bon Bisiña a sera 700 pakete di kuminda ku a keda repartí via di e diferente misanan pa famianan di menos rekurso.

Danki na Van Der Tweel Supermarket i nan klientenan, Leo Club, koleganan di Starbucks, Lioness Selma, amigo i miembronan di Curaçao Lions Club ku a kontribui grandemente na éksito di e proyekto Bon Bisiña.