Djaweps dia 23 di ougùstùs tabata e fecha ku AMAK a keda lantá ofisialmente. Di e miembronan di e promé direktiva, ta solamente Anselmus “Boy” Dap ta na bida.

Asosiashon di Músiko i Artista di Kòrsou a keda funda espesialmente pa Sali na vanguardia e tempu ei di nos músikonan ku no por a haña oportunidat pa toka den hotèl grandinan na Kòrsou.

Naturalmente un fecha memorabel asina aki no por pasa sin pone debido atenshon na dje.

AMAK lo tene un selebrashon, kaminda lo bai tin un konsierto grandi dia 7 di òktober den Curaçao Festival Center, ku presentashon di varios artista lokal. Durante di un parti di e programa, lo toka un repertorio di 22 komposishon di entre añanan 40 pa 60. Tur e komposishonnan aki lo keda presentá pa nos kantantenan lokal i lo keda areglá pa Gedeon Chandler den un bachi nobo.

Ademas di e konsierto aki, e selebrashon di dia di músiko di e aña aki, lo keda organisá den un forma mas spesial, kaminda lo kombiná entrega di Premio Edgar Supriano, Pen di Mérito ku un resepshon pa músiko i invitadonan na Sambil.

Pronto AMAK lo duna tur detaye relashoná ku e aktividatnan ku lo keda organisá den kuadro di selebrashon di 50 aña AMAK. Direktiva di AMAK ta hopi agradesido na e pioneronan ku a bini ku e inisiativa pa lanta e organisashon i un danki spesial ta bai na tur e famianan di esnan konserní.

Finalmente un danki masha spesial ku e sosten ku AMAK a risibí durante di tur e aña nan di diferente instansia i tambe di medionan di publisidat.

Pabien na tur nos músikonan di Kòrsou

Direktiva di AMAK