Proyekto di 72 apartamentu Sapaté awor un realidat.

Proyekto Apartamentunan di Sapaté for di su konsepshon tabata inkluí un kantidat di novedat. Por menshoná, hasi uso di un tereno ku por akapará un seri di apartamentu, krea un forma di biba di tres piso, bin ku un Sistema di konstrukshon mas moderno i rápido i por último selekshoná huntu ku Ministerionan SOAW i VVRP un grupo di kliente ku mester pasa den un proseso di preparashon ku durashon di 9 siman pa por bin na remarke pa habitá un dje apartamentunan.

Den e trayekto e grupo a risibí informashon riba temanan manera, ekonomia, edukashon,seguridat, nutrishon i konvivensia.

Despues di e trayekto di preparashon kada grupo di 24 Persona a risibí nan sertifikado kual ta nifiká ku nan ta kla pa habitá e apartamentunan. Fundashon Kas Popular a presentá un reportahe di tur loke a tuma lugá tantu na inisio, durante i na final di kada siklo di preparashon di un grupo di kliente.

Resientemente e último grupo di 48 persona a terminá nan período di preparashon i awor nan ta kla pa habitá e kasnan. Ku plaser Gerensia di Fundashon Kas Popular ta presentá bo e último produkshon Sapaté 4. Esaki lo wòrdu transmití na Kanal 8 djamars 2 di òktober 7:30 pm i na TVDirect kanal 13 djárason 3 di òktober pa 9:10 pm.

Gerensia di Fundashon Kas Popular i Ministerionan SOAW i VVRP ta gradisí tur esnan ku di un forma òf otro a sostené e proyekto.