Willemstad- 2013 tabata un aña ku hopi progreso pa CAP i tambe pa Curaçao International Airport. 2014 ta primintí di bolbe bira un aña ku diferente retonan pero tambe ku hopi desaroyonan eksitante. “E esfuerso di tur empleado di CAP lo bai ta enfoká riba diligensia, efisiensia i dedikashon pa ofresé e mihó produkto operashonal i e mihó servisio na kliente ku un aeropuerto lo por duna”, Ralph Blanchard, CEO di Curaçao Airport Partners (CAP) a bisa. Na 2013 CAP a invertí aproksimadamente US$10 mion den vários proyektonan nobo pa mehorá e infrastruktura di nos aeropuerto entre otro den: stulnan nobo den terminal; upgrade parti di e runway, raxiway i kaminda e avionnan ta pera na terminal; upgrade e bañonan den e terminal; instalashon di balinan nobo na imigrashon i tambe diferente otro proyektonan. Banda di esei e tim di maneho di CAP a kuminsá ku planifikashon pa desaroyá proyektonan signifikante ku ta nesesario pa mehorá e funshonalidat i tambe e nivel kompetitivo di nos aeropuerto. CAP a invertí tambe den training di empleadonan i kondusí un enkuesta riba embolbimentu di empleadonan pa asina tin un mihó komprendementu di preokupashon ku e empleadonan por tin i tambe pa mehorá e produktividat. Den 2014, CAP a plania pa invertí US$10 mion atrobe den proyektonan nobo pa kontinuá e proseso pa mehorá infrastruktura i tambe pa mehorá e plataforma di operashon i komersial ku CAP mester uza pa sostené su servisio i pa sigurá e éksito kompetitivo di nos aeropuerto. Blanchard a re-enfatisá, e kompromiso di e akshonistanan di CAP pa ku e aeropuerto í Kòrsou na empleadonan di CAP. Segun Blanchard e imbershonnan i proyektonan ta sigurá ku CAP lo ta eksitoso. E imbershonnan signifikante tambe ta sigurá ku nos tur lo sigui tin trabou i lo por krea mas kupo di trabou.” Blanchard a sigui bisa, “Ta pa e motibu ei nos mester di kompromiso di nos empleadonan ku lo duna lo máksimo na kada momento. Un I tur, den kua posishon ku nan por tin, ta forma un parti kritiko den e éksito di CAP”. Imbershonnan grandi planea pa 2014 ta inkluí entre otro un programa pa ekspandé i modernisá e terminal; establesimentu di un Fixed Base Operation (FBO) kaminda avionnan priva lo por para; komienso di e diseño i planifikashon di Airport Plaza; start di e proyekto pa erkondeshen den e áreanan di ‘Check in’ i ‘Security processing’; kontinuashon di e proyekto pa mehorá e runway, taxiway  i kaminda avionnan ta stashoná na terminal. CAP a kuminsá tambe ku un kampaña agresivo pa duna atenshon na Kòrsou komo destinashon pa aerolineanan regional i tambe pa aerolineanan internashonal. “Nos lo sigui invertí tambe den kapasidat di nos empleadonan den 2014. Nos enfoke pa ku edukashon i training lo ta riba alsamentu di e nivel di konosementu i kapasidat di nos supervisor i kordinadónan pa asina por sigurá éksito kompetitivo di nos empleadonan i konsekuentemente di nos aeropuerto“  Blanchard a bisa. “For di mi punto di bista, futuro ta mustra hopi bon pa CAP i pa nos tur ku ta asosiá ku nos aeropuerto. Pero mi no por ripití sufisiente e nesesidat pa nos dediká nos mes na hasi nos trabou bon, efisiente i ku dedikashon pa nos por ofresé e produkto di aeropuerto mihó posibel na nos klientenan. Nos orguyo den nos mes i den nos pais mester manifestá nan mes den e manera ku nos aeropuerto ta lusi i funshoná. Esei ta nos kontribushon na éksito ekonómiko di Kòrsou .. I esei ta un responsabilidat ku ta riba lomba di nos tur. Laga nos karg’é ku orguyo!” Blanchard a finalisá bisando.