Na mart Floris Suite Hotel ta hasi 20 aña i Rainbow Lounge, e konosí Happy Hour riba djabièrnè ta selebrá su di ocho aña di eksistensia. Pa selebrá esaki i pa yama públiko danki e hotel ta invitá un i tur djabièrnè 6 di mart próksimo, na e último Rainbow Lounge na hotel Floris Suite. Despues di Pasku e hotel lo sera su portanan pa un renovashon kompleto.

Lo kambia nòmber di Rainbow Lounge pa “Rainbow Lounge on Tour”. Kada último djabièrnè di luna lo tene Rainbow Lounge na otro lugá. Tur kuminsamentu di luna, via e página di Facebook “Rainbow Lounge Curaçao”, lo anunsiá na unda lo tene e happy hour e luna ei. Dia 27 di mart lo tene e promé “On Tour” na Omundo.

E renovashon profundo di Floris Suite Hotel lo kuminsá 13 di aprel próksimo. Kabamentu di fakansi grandi e hotel lo habri su portanan komo parti di AM Resorts i DREAMS PREFFERED 5star Adults Only all-inclusive Resort & Spa. Gran parti di e personal i gerensia lo konsistí di e karanan ya konosí anto tambe lo tin karanan nobo. Naturalmente tur hende ta bonbiní pa bishitá tantu e hotel komo e beach club te ku Pasku.

Komo ya ta tradishon Curaçao Pride lo tuma lugá den e dilaster siman di sèptèmber di 2020. E programa pa e siman ei ta kasi kompletamente konosí i lo anunsiá e lokashonnan di e fiestanan pronto. Lo lansa e di ocho edishon di Pride Villager pronto i ademas lo agregá un plataforma online pa tur LHBT lokal i turistanan ku ta bishitá nos isla.  

Por tuma kontakto pa mas informashon via info@florissuitehotel.com