Willemstad – Aprel 2015: Di tres edishon di ENNIA Sprint Triathlon ta pará dilanti porta atrobe. Próksimo wikènt riba dianan 18 i 19 di aprel e deportistanan ta kompetí kontra otro riba tera i laman na Kokomo Beach.

Curacao Triathlon Association (CTA) ta organisá ENNIA Sprint Triathlon. ENNIA, komo kompania di seguro enbolbí ku su komunidat  ta orguyoso di por kontribuí na un estilo di bida salú i deportivo na Kòrsou. Esaki e kompania  ta hasi sosteniendo entre otro eventonan  deportivo.

Djasabra awor muchanan entre 6 i 14 aña ta inisiá e evento, ku Kids Triathlon. Pa e muchanan tin diferente distansha pa kada kategoria di edat pa loke ta e partinan landamentu, kareda di baiskel i korementu duru. E evento ta kuminsá djasabra awor mitar di 4 atardi. Djadumingu 19 di aprel  adultonan por mustra nan banda deportivo durante ENNIA Sprint Triathlon, den e kategorianan  landamentu (750 meter), kareda di baiskel (20 km) i korementu duru (5 km). Partisipantenan por akumulá punto pa e ranking di Curacao Triathlon Association (CTA) . Djadumingu e triatlòn ta kuminsá 8’or,  i 10or  tin otorgashon di premio. E kompetensha ta habrí pa tantu atletanan versá komo esnan mas nobato, entre 15 pa 80 aña. Ta obligatorio pa inskribí online via www.triathlon-curacao.com.

E ENNIA Sprint Triathlon na Kokomo ta un evento pa kuminsá kalentá pa e ENNIA Curaçao International Triathlon ku ta tuma lugá djadumingu 24 di mei na Santa Barbara Golf & Beach Resort. E distanshanan di e triatlón akí, kaminda tur aña hopi atleta internashonal tambe ta partisipá ta: landamentu 1.5 km, kareda di baiskel 40 km i korementu duru 10 km. Por partisipá den tim di relay tambe. Mas informashon tokante e eventonan akí por haña riba www.triathlon-curacao.con i via numbernan di telefòn 540 4321 / 515 5005.