Warrens, Barbados, September 14, 2015 (CIBC FirstCaribbean) – Tur wowo ta fiha riba sostenedonan mayó i organisashonnan ku ta enkargá nan mes ku e lucha kontra kanser na momentu ku CIBC FirstCaribbean ta prepará pa su Walk for the Cure ku lo keda tene dia 17 di Òktober próksimo. E kaminata, ku ta na benefisio di organisashonnan den lucha kontra kanser den region, lo uni mas di 10,000 partisipante entusiasmá den 17 pais kaminda e banko ta operá den un esfuerso unifiká i kompromiso pa asistí esnan afektá pa kanser.

Esaki ta e di kuater aña di e Walk for the Cure ku a generá aproksimadamente US$300,000 destiná pa sostené kuido nesesario di kanser, kumpra ekipo esensial pa trata pashèntnan i perkurá pa programanan edukashonal general pa krea mas konsenshi tokante di e malesa den region. E aña aki e banko su meta pa kibra e rekòrt di aña pasa i generá US$300,00 di kua ya a logra sigurá US$110,00 den e dos lunanan promé ku e evento tan antisipá.

E dos personanan ku ta presedi e organisashon di e kaminata ta e dos ehekutivonan den Executive Team di CIBC FirstCaribbean esta Trevor Torzsas i Mark St. Hill, a apoyá e esfuerso pa generá entrada dor di e staf di e banko i patrosinadònan entusiasmá den komunidat ku a bin ta asosiá komo patrosinadó.

Na nomber di Executive Team, Pim van der Burg, Managing Director Dutch Caribbean a bisa: ” Nos ta inmensamente orguyoso di nos empleadonan den region. Nan a uni pa hasi e kousa un kousa komun, pa sostené esnan den nos komunidat ku ta afektá pa e malesa. Nos na CIBC FirstCaribbean no a keda sin sinti efekto di kanser. Nos a pèrdè algun kolega i algun famia di nos koleganan debí na e malesa aki. Nos ke duna di nos parti pa yuda den e lucha tan importante aki.” E brènch di CIBC FirstCaribbean na Kòrsou lo tene su kaminata Djasabra 17 di Òktober próksimo i ta konta ku sosten di e.o. Always, Curaçao Marriott Beach Resort & Emerald Casino, Curoil, Dasani, Ennia, Ensure, LBH Group, NuCapital, One Media Group i Tampax.

E organisadónan di e kaminata ta basta okupá ku e finalisá e plannan pa e diferente eventonan relashoná ku e kaminata. E banko a partner ku e organisashonnan ku ta den lucha kontra kanser na tur momentu.

Empleadonan di banko ta envolví den un seri di aktividat pa generá fondo den sukursalnan di banko miéntras ku nan mes ta sigui duna tempu i sèn generosamente pa sostené e kousa. E públiko i patrosinadònan korporativo tambe tin oportunidat pa duna nan sosten dor di hasi un donashon of kumpra t-shirt pa nan trahadonan. Klientenan por pasa na kualke sukursal di CIBC FirstCaribbean den region i hasi un kontribushon.

Lysaira Ortela, Marketing Manager di CIBC FirstCaribbean na Korsou a bisa:

“Kòrsou a kuminsá tempran ku nos esfuersonan pa generá fondo e aña aki. E CIBC FirstCaribbean High Tea 8 di Mart último, na okashon di Dia Internashonal di Hende Muhé tabata un evento notabel ku a simbolisá e kreatividat i dedikashon ku nos ta invertí den e kousa noble aki e aña aki atrobe. Nos ta konta ku komunidat lo brasa e Walk for the Cure e ana aki atrobe i hasié un éksito grandi. Di e forma aki nos por sostené e kousa valioso di Prinses Wilhelmina Fonds.”

E kaminata ta keda tene na mes momentu ku e Canadian Breast Cancer Foundation’s CIBC Run for the Cure ku ta ser patrosiná pa e banko su kompania madre CIBC. CIBC a bin ta sostené e evento aki pa mas di 20 aña, kontribuyendo ku vários mion na investigashon tokante kanser na pechu na Canada.